दोन दिवसांत राजकीय नाट्य, अभिजीत पवारांचा नवा खुलासा
मुंबई: महाराष्ट्राच्या राजकारणात पुन्हा एकदा मोठी खळबळ उडाली आहे. राष्ट्रवादी काँग्रेस (शरद पवार गट) चे कट्टर समर्थक अभिजीत पवार (Abhijit Pawar) यांनी अवघ्या 48 तासांत आपला निर्णय बदलत मोठा राजकीय यूटर्न घेतला आहे. मंगळवारी (18 तारखेला) त्यांनी राष्ट्रवादी काँग्रेस (अजित पवार गट) मध्ये प्रवेश केला होता. मात्र, गुरुवारीच (20 तारखेला) त्यांनी पुन्हा शरद पवारांच्या गटात पुनरागमन केले आहे. या नाट्यमय घडामोडींमुळे संपूर्ण राज्यात चर्चेला उधाण आले आहे.
दररोज महत्वाच्या घडामोडी आणि MBC Marathi च्या संपर्कात राहण्यासाठी आमचा सोशल मीडिया फॉलो करा.
https://twitter.com/AjitPawarSpeaks/status/1891869454713126933
Abhijit Pawar : दबाव टाकून पक्ष बदलण्यास भाग पाडले!
गुरुवारी ठाण्यात पत्रकार परिषद घेत अभिजीत पवार यांनी आपल्यावर प्रचंड दबाव टाकण्यात आल्याचा गंभीर आरोप केला. “माझ्यावर जबरदस्ती करून अजित पवार गटात सामील होण्यासाठी दबाव टाकण्यात आला होता. माझा वापर आमदार जितेंद्र आव्हाड यांना अडकवण्यासाठी केला जाणार होता,” असा धक्कादायक दावा त्यांनी केला.
Abhijit Pawar : आव्हाडांचा फोन नसता आला तर आत्महत्या केली असती!
पत्रकार परिषदेत बोलताना अभिजीत पवार यांनी आणखी एक धक्कादायक खुलासा केला. “या संपूर्ण घटनाक्रमामुळे मी इतका अस्वस्थ झालो होतो की, आत्महत्या करण्याचा विचार करत होतो. मात्र, आमदार जितेंद्र आव्हाड यांचा फोन आला नसता, तर कदाचित मी टोकाचा निर्णय घेतला असता,” असे त्यांनी स्पष्ट केले.
ईडी आणि पोलिसांच्या धमक्यांचा आरोप
अभिजीत पवार यांनी आपल्याला सतत धमक्या दिल्या जात असल्याचाही दावा केला आहे. “माझ्या मित्रांना पोलिसांच्या माध्यमातून धमकावले जात होते. मला ईडीची धमकीही देण्यात आली. इतकंच नव्हे, तर माझ्या आई आणि पत्नीला घाबरवण्याचा प्रयत्न केला गेला,” असा गंभीर आरोप त्यांनी केला.
“माझा वापर राजकीय हेतूसाठी”
अभिजीत पवार यांनी स्पष्ट केले की, “मी अजित पवार गटात प्रवेश करण्याचा निर्णय घेतला तो फक्त दबावामुळे. मात्र, मला नंतर समजले की, माझा वापर हा केवळ आमदार जितेंद्र आव्हाड यांना अडकवण्यासाठी केला जात आहे. हे लक्षात येताच मी पुन्हा शरद पवार गटात परतलो.”
“आव्हाडांनी मला स्वीकारलं नाही तरी मी त्यांना सोडणार नाही!”
अभिजीत पवार यांनी पत्रकार परिषदेत एक ठाम भूमिका घेतली. “आता आमदार जितेंद्र आव्हाड यांनी मला पुन्हा स्वीकारले नाही, तरी मी त्यांना कधीच सोडणार नाही. मरेपर्यंत मी त्यांच्या सोबतच राहणार,” असे त्यांनी स्पष्ट केले.
48 तासांत राजकीय नाट्य: मोठा धक्का की रणनीती?
अवघ्या 48 तासांत अभिजीत पवार यांच्या या नाट्यमय यूटर्नमुळे महाराष्ट्राच्या राजकारणात प्रचंड चर्चा रंगली आहे. हा एक मोठा धक्का आहे की, ही एक रणनीती होती, यावर वेगवेगळ्या राजकीय विश्लेषकांचे मतमतांतरे आहेत. मात्र, या घटनेमुळे राजकीय वर्तुळात मोठी खळबळ माजली आहे.
