Chhava : विकी कौशलची प्रमुख भूमिका असलेला ‘छावा’ चित्रपट बॉक्स ऑफिसवर धमाकेदार कमाई करत आहे. रिलीज झाल्यानंतर अवघ्या आठवड्यात भारतात २०० कोटी आणि जगभरात ३०० कोटींचा गल्ला जमवत या चित्रपटाने प्रेक्षकांची मनं जिंकली आहेत.
दररोज महत्वाच्या घडामोडी आणि MBC Marathi च्या संपर्कात राहण्यासाठी आमचा सोशल मीडिया फॉलो करा.
मराठी अभिनेते मकरंद अनासपुरे यांनी छत्रपती शिवाजी महाराजांच्या जयंतीनिमित्त कुटुंबासोबत हा चित्रपट पाहिला आणि त्यानंतर आपल्या भावना व्यक्त केल्या.
Chhava Movie: मकरंद अनासपुरे (Makrand Anaspure) यांची भावनिक प्रतिक्रिया
चित्रपट पाहिल्यानंतर माध्यमांशी बोलताना अनासपुरे म्हणाले, “आजच्या पिढीला आपल्या इतिहासाची जाणीव होणे गरजेचे आहे. महाराष्ट्रातील पालकांनी हा सिनेमा आपल्या मुलांना नक्की दाखवावा. आपल्या वीरांच्या पराक्रमाची ओळख होणं आवश्यक आहे.”
त्यांनी पुढे सांगितले, “मी अनेक हिंदी भाषिक मित्रांची प्रतिक्रिया ऐकली, की त्यांना छत्रपती संभाजी महाराजांचा इतिहास शाळेत शिकवला गेला नाही. हा चित्रपट समाजाला जातीपातीच्या पलीकडे नेण्याचे काम करेल. आपल्या पूर्वजांनी आपल्यासाठी मोठे त्याग केले आहेत आणि हा वारसा पुढच्या पिढीपर्यंत पोहोचवणे ही आपली जबाबदारी आहे.”
‘छावा’ (Chhava) चित्रपटामुळे इतिहास नव्याने उलगडतो
अनासपुरे यांनी चित्रपटाच्या संकल्पना आणि मांडणीचे विशेष कौतुक केले. ते म्हणाले, “आपण इतिहासाचे विकृतीकरण न करता त्याचा सन्मान केला पाहिजे. ‘छावा’ चित्रपटाने छत्रपती संभाजी महाराजांचा धगधगता इतिहास प्रभावीपणे मांडला आहे. दिग्दर्शक लक्ष्मण उतेकर आणि कलाकारांनी उत्तम कामगिरी बजावली आहे. विकी कौशलसह रश्मिका मंदाना, अक्षय खन्ना आणि सर्व मराठी कलाकारांचे मनःपूर्वक अभिनंदन!”
जातीयतेच्या विघटनावर ‘छावा’ (Chhava) ठरेल प्रभावी उपाय?
सध्या महाराष्ट्रात जातीय वातावरण बिघडवण्याचे प्रकार सुरू असताना हा चित्रपट समाजाला एकसंघ करण्यासाठी महत्त्वाची भूमिका बजावेल, असेही अनासपुरे म्हणाले. त्यांनी शिवचरित्राच्या अभ्यासपूर्ण लेखनाची गरज अधोरेखित केली आणि इतिहास संशोधकांनी योग्य संशोधन करून समाजाला सत्य इतिहास उपलब्ध करून द्यावा, अशी अपेक्षा व्यक्त केली.
“मी हा चित्रपट पाहताना लहान मुलांना रडताना पाहिले, त्यातच या सिनेमाचा विजय आहे. व्यवसायिक यशापेक्षा हा चित्रपट लोकांना एकत्र आणण्यासाठी प्रभावी ठरेल, अशी मला खात्री आहे.”
