Nashik : देवळाली कॅम्प पोलिस ठाणे हद्दीतील बेलतगव्हाण शिवार, लॅमरोड येथील एका सॅनेटोरियममध्ये सशस्त्र टोळीने हल्ला करत सुमारे अडीच लाख रुपयांचा ऐवज लुटल्याची घटना उघड झाली आहे. या प्रकरणी माजी नगरसेवक पवन पवार यांच्यासह चौघांविरुद्ध दरोड्याचा गुन्हा दाखल करण्यात आला आहे.
दररोज महत्वाच्या घडामोडी आणि MBC Marathi च्या संपर्कात राहण्यासाठी आमचा सोशल मीडिया फॉलो करा.
फिर्यादी प्रताप चुंभळे (३४, रा. सुंदरबन कॉलनी, लेखानगर) यांनी दिलेल्या तक्रारीनुसार, ७ एकर ९ गुंठे जागेवरील सॅनेटोरियमची मालकी कायदेशीर प्रक्रियेने त्यांनी महावीर एन्टरप्राईजच्या भागीदारीतून घेतली होती. शुक्रवारी रात्री ८ वाजता, पवन पवार, विशाल पवार, रामेश्वर पटेल, युवराज मोरे, नाना पगारे यांच्यासह ५०-६० जणांच्या टोळीने सशस्त्र हल्ला केला.
टोळीने सुरक्षारक्षकांना धमकावून मारहाण केली. तसेच, सॅनेटोरियममध्ये सीसीटीव्ही बसवणाऱ्या इंजिनिअरलाही धमकावून बाहेर काढले. परिसरात सीसीटीव्ही कॅमेरे बसविण्याचे काम सुरू असताना ही घटना घडली.
टोळीने सॅनेटोरियममधील टेबलचे ड्रॉवर तोडून सुमारे १.७० लाख रुपयांची रोकड, जमीन मालकीचे दस्तऐवज, डीव्हीआर, सहा सीसीटीव्ही कॅमेरे, बॅटरी, युपीएस, एलईडी टीव्ही यांसह सुमारे अडीच लाख रुपयांचा ऐवज लुटून नेला.
या प्रकरणी देवळाली कॅम्प पोलिस ठाण्यात माजी नगरसेवक पवन पवार यांच्यासह चौघांविरुद्ध दरोड्याचा गुन्हा दाखल करण्यात आला आहे. पोलिसांनी तपास सुरू केला असून आरोपींचा शोध घेतला जात आहे.
या घटनेमुळे देवळाली कॅम्प परिसरातील स्थानिक नागरिकांमध्ये भीतीचे वातावरण निर्माण झाले आहे. व्यापार आणि निवासी क्षेत्रांमध्ये अशा घटनांमुळे चिंता व्यक्त होत असून सुरक्षेच्या उपाययोजनांवर भर देण्याची मागणी होत आहे.Nashik पोलिसांनी परिसरातील सीसीटीव्ही फुटेज तपासत टोळीच्या हालचालींबाबत माहिती मिळवण्याचा प्रयत्न सुरू केला आहे.
पोलिसांनी आरोपींना लवकरात लवकर अटक करून न्याय देण्याची अपेक्षा स्थानिक रहिवाशांकडून व्यक्त होत आहे.
हे पण वाचा : नाशिक शहर पोलीस दलात २० नवीन दुचाकी वाहने दाखल
