Latest News : महाराष्ट्र सायबर Maharastra Cyber सुरक्षा प्रकल्पाचा शुभारंभ उपमुख्यमंत्री आणि गृहमंत्री देवेंद्र फडणवीस यांच्या हस्ते नवी मुंबईच्या महापे औद्योगिक वसाहतीमधील मिलेनियम बिझनेस पार्क येथे करण्यात आला. या प्रकल्पाच्या माध्यमातून सायबर हल्ल्यांवरील भीती कमी होईल आणि डिजिटली होणाऱ्या फसवणुकीचे प्रमाण घटेल, असा विश्वास उपमुख्यमंत्री देवेंद्र फडणवीस यांनी व्यक्त केला. या प्रकल्पामुळे राज्यातील नागरिकांना सायबर गुन्ह्यांपासून संरक्षण मिळणार असून, हे केंद्र भारतातील सर्वात अत्याधुनिक सायबर सुरक्षा केंद्रांपैकी एक असेल.
दररोज महत्वाच्या घडामोडी आणि MBC Marathi च्या संपर्कात राहण्यासाठी आमचा सोशल मीडिया फॉलो करा.
या उद्घाटन कार्यक्रमात आमदार रमेश पाटील, पोलीस महासंचालक रश्मी शुक्ला, अतिरिक्त मुख्य सचिव (गृह) इक्बालसिंह चहल, अपर पोलीस महानिरीक्षक अर्चना त्यागी, विशेष पोलीस महानिरीक्षक (सायबर) यशस्वी यादव, पोलीस महानिरीक्षक (आर्थिक गुन्हे) बिपिन कुमार सिंह, मुख्यमंत्र्यांचे प्रधान सचिव ब्रिजेश सिंह, नवी मुंबईचे पोलीस आयुक्त मिलिंद भारंबे, औद्योगिक विकास महामंडळाचे व्यवस्थापकीय संचालक पी. वेलरासू, उपमुख्यमंत्र्यांचे विशेष कार्य अधिकारी कौस्तुभ धवसे, गृह विभागाचे सहसचिव राहुल कुलकर्णी, वास्तूरचनाकार सलोनी देवधर आणि अन्य अधिकारी उपस्थित होते.
फडणवीस यांनी या प्रकल्पाला ‘ड्रीम प्रोजेक्ट’ आणि राज्यासाठी एक आयकॉनिक प्रकल्प म्हणून संबोधले. डिजिटायजेशनच्या वाढत्या काळात सायबर हल्ल्यांचे प्रमाण वाढत आहे, आणि या आव्हानांना तोंड देण्यासाठी हा प्रकल्प महत्त्वपूर्ण ठरेल, असे त्यांनी सांगितले. सायबर सुरक्षा प्रकल्पामुळे राज्यातील पोलिसांना दरवर्षी सायबर गुन्ह्यांशी लढण्यासाठी प्रशिक्षण दिले जाईल. या प्रकल्पामुळे महाराष्ट्र तंत्रज्ञान क्षेत्रात आपले नेतृत्व कायम राखणार असून, हे केंद्र देशभरात सायबर सुरक्षा शिक्षणाचे केंद्र बनेल, अशी अपेक्षा त्यांनी व्यक्त केली.
सायबर सुरक्षा प्रकल्पाचे उद्घाटन करताना फडणवीस म्हणाले की, सायबर हल्ल्यांच्या धोरणात्मक उपाययोजना करण्यासाठी या प्रकल्पामुळे मोठा दिलासा मिळेल. व्हाट्सअप आणि फेसबुक सारख्या सोशल मीडिया प्लॅटफॉर्म्सवरून खोटे संदेश पसरवून फसवणूक होत असल्याचे त्यांनी नमूद केले. यावर प्रभावी उपाययोजना करण्यासाठी सरकारने हे आधुनिक केंद्र सुरू केले आहे.
यावेळी त्यांनी प्रकल्पाच्या यशस्वितेमध्ये योगदान दिलेल्या मुख्यमंत्र्यांचे प्रधान सचिव ब्रिजेश सिंह, विशेष पोलीस महानिरीक्षक (सायबर) यशस्वी यादव, आणि कौस्तुभ धवसे यांचे विशेष कौतुक केले.
हा प्रकल्प फक्त महाराष्ट्रापुरता मर्यादित न राहता, इतर राज्यांनाही सायबर सुरक्षा बाबत मार्गदर्शन करू शकेल. याशिवाय, प्रकल्पाच्या माध्यमातून खासगी क्षेत्रातील तंत्रज्ञान तज्ज्ञांशी समन्वय वाढवण्याची गरजही त्यांनी व्यक्त केली.
उद्घाटन सोहळ्यादरम्यान 14407 हा हेल्पलाईन नंबर देखील लाँच करण्यात आला, ज्याचा उपयोग सायबर गुन्ह्यांच्या तक्रारींसाठी केला जाईल. 15 ऑक्टोबरपासून या प्रकल्पातील सर्व सेवा पूर्ण क्षमतेने सुरू होतील.
