Nashik : नाशिकमध्ये कंपनीत नोकरी लावून देण्याच्या बहाण्याने २३ लाख ३८ हजार रुपयांची ऑनलाईन फसवणूक झाल्याची घटना उघडकीस आली आहे. अज्ञात भामट्यांनी बेरोजगारांना जॉबची आमिषे दाखवून त्यांच्याकडून मोठी रक्कम उकळली. या प्रकरणी सायबर पोलिस ठाण्यात गुन्हा दाखल झाला असून तपास सुरू आहे.
सुशिक्षित बेरोजगारांची फसवणूक
फिर्यादी आणि साक्षीदार हे नोकरीच्या शोधात होते. या संधीचा फायदा घेत, अनोळखी मोबाइल नंबरवरून संपर्क साधणाऱ्या व्यक्तीने करिअर बिल्डर्स एचआर एजन्सी आणि इनडीड डॉट कॉमच्या नावाने विश्वास संपादन केला. टाटा मोटर्स आणि मलेशिया डेअरी इंडस्ट्रीजमध्ये नोकरी मिळवून देण्याचे खोटे आश्वासन देत, भामट्यांनी विविध शुल्कांच्या नावाखाली रक्कम जमा करायला लावली.
ऑनलाइन लिंकद्वारे पैसे उकळले
अनोळखी इसमाने रजिस्ट्रेशन फी, शिक्षणाची पडताळणी, आणि इंटरव्ह्यूची तयारी यासाठी वेगवेगळ्या लिंकद्वारे पैसे ट्रान्सफर करण्यास भाग पाडले. विविध बँक खात्यांमध्ये २३ लाख ३८ हजार ४९७ रुपये भरूनही नोकरी न मिळाल्याने फसवणूक झाल्याचे उघड झाले.
Nashik पोलिसांकडून तपास सुरू
१० सप्टेंबर २०२३ ते २ जानेवारी २०२५ या कालावधीत हा प्रकार घडला. जॉब मिळत नसल्यामुळे हतबल झालेल्या पीडितांनी पुन्हा संपर्क साधण्याचा प्रयत्न केला, परंतु संबंधित नंबर कायम बंद येत होता. शेवटी त्यांनी सायबर पोलिस ठाणे गाठून तक्रार दाखल केली.
सध्या या प्रकरणाचा तपास पोलिस निरीक्षक शेख यांच्या नेतृत्वाखाली सुरू आहे. बेरोजगारांना अशा फसवणुकीपासून सतर्क राहण्याचे आवाहन सायबर पोलिसांनी केले आहे.
