सिंधुदुर्ग, 22 फेब्रुवारी: भाजप नेते आणि मंत्री नितेश राणे (Nitesh Rane) यांनी पुन्हा एकदा आपल्या परखड शैलीत विरोधकांवर जोरदार टीका केली आहे. सिंधुदुर्गमध्ये आयोजित एका कार्यक्रमात बोलताना त्यांनी निधी वाटप आणि भाजपच्या कार्यकर्त्यांना संधी यावर स्पष्ट भूमिका मांडली.
दररोज महत्वाच्या घडामोडी आणि MBC Marathi च्या संपर्कात राहण्यासाठी आमचा सोशल मीडिया फॉलो करा.
Nitesh Rane : भाजपच्या कार्यकर्त्यांसाठी सुवर्णसंधी
एप्रिल महिन्यात नवीन आर्थिक वर्ष सुरू होताच, पहिल्या आठवड्यात सरपंचांची यादी तयार केली जाईल. भाजपच्या कार्यकर्त्यांना 100 टक्के निधी मिळेल, तर उबाठाच्या (उद्धव बाळासाहेब ठाकरे गट) कार्यकर्त्यांना शून्य निधी राहील, असे स्पष्ट शब्दांत नितेश राणे म्हणाले. “बोंबलत बसा, काही फरक पडत नाही,” असा टोला त्यांनी विरोधकांना लगावला.
‘भाजप वाढला पाहिजे’ – राणे (Nitesh Rane) यांचा आग्रह
राणेंनी कार्यकर्त्यांना संधीचं सोनं करण्याचं आवाहन करताना सांगितले की, भाजपच्या कार्यकर्त्यांना समित्या आणि पदांमध्ये प्राधान्य दिले जाणार आहे. “आता सत्ता तुमची आहे, त्यामुळे बोंबलत बसू नका,” असा सल्ला त्यांनी दिला.
महाविकास आघाडीच्या कार्यपद्धतीवर टीका
राणेंनी महाविकास आघाडीच्या (मविआ) कार्यकाळातील अनुभव शेअर करताना सांगितले की, “तेव्हा आम्ही विरोधी पक्षात होतो, आमच्या प्रकल्पांना स्थगिती देण्यात आली. उद्धव ठाकरे मुख्यमंत्री असताना भाजपच्या आमदारांनी दिलेल्या यादीत 80-90% बदल करण्यात आले.” आज भाजप सत्तेत आल्यावर विरोधकांना त्याच औषधाची चव लागत आहे, असा घणाघात राणेंनी केला.
“कर्ज घेतलंय, ते व्याजासह परत करणार!”
महाविकास आघाडीच्या काळात भाजपच्या कार्यकर्त्यांवर अन्याय झाला, त्याचा हिशेब आता पूर्ण केला जाणार असल्याचेही त्यांनी स्पष्ट केले. “आमच्या लोकांना आत टाकलं, आम्हीही जंगल दाखवू,” असे ते म्हणाले.
उबाठा आणि मविआच्या गावांना टार्गेट करण्याचे आदेश
कार्यकर्त्यांना संबोधित करताना राणेंनी उबाठा आणि महाविकास आघाडीच्या गावांवर लक्ष केंद्रित करण्याचे निर्देश दिले. “देवेंद्र फडणवीस आणि नरेंद्र मोदी दिवसरात्र काम करत आहेत. भाजपच्या माध्यमातून सर्व लाभ मिळत आहेत, त्यामुळे दुसरीकडे जाण्याची गरज नाही,” असे ते म्हणाले.
“गावोगावी भाजप मजबूत करा”
सावंतवाडी मतदारसंघात भाजप प्रत्येक गावात पोहोचला पाहिजे, असे स्पष्ट करत राणेंनी कार्यकर्त्यांना आदेश दिले की, “गाडीत बसा, पट्टा बांधा आणि भाजपला बळकट करा!”
नितेश राणेंच्या या वक्तव्याने राजकीय वर्तुळात चांगलीच खळबळ उडाली आहे. सिंधुदुर्गातील राजकीय समीकरणे यामुळे बदलण्याची शक्यता आहे. आगामी काळात भाजपच्या कार्यपद्धतीत मोठे बदल पाहायला मिळतील का, याकडे सर्वांचे लक्ष लागले आहे.
