नांदगाव विधानसभा मतदार संघामध्ये आगामी निवडणुका सध्या चांगल्याच चर्चेत आहेत. माजी खासदार समीर भुजबळ यांच्या उमेदवारीची चर्चा सुरु असून, त्यांच्याबाबत मोठ्या राजकीय हालचाली घडत आहेत. उपमुख्यमंत्री अजित पवार यांनी समीर भुजबळ यांना मुंबई अध्यक्षपदाचा राजीनामा देण्याचा सल्ला दिला आहे. कारण समीर भुजबळ महाविकास आघाडीच्या संपर्कात असून, ते राष्ट्रवादी शरद पवार गट किंवा शिवसेना ठाकरे गटाकडून निवडणूक लढवण्याची शक्यता आहे.
दररोज महत्वाच्या घडामोडी आणि MBC Marathi च्या संपर्कात राहण्यासाठी आमचा सोशल मीडिया फॉलो करा.
नांदगाव मतदार संघात सध्या शिवसेना शिंदे गटाचे आमदार सुहास कांदे यांचा प्रभाव वाढल्याचे बोलले जात होते. मात्र, समीर भुजबळ यांची उमेदवारी ठरल्यामुळे कांदे यांच्या उमेदवारीला विरोध करण्यासाठी भुजबळ समर्थकांनी उपमुख्यमंत्री अजित पवार यांची भेट घेतली. या विरोधामुळे कांदे यांचे स्थान असुरक्षित झाल्याचे दिसत आहे.
भुजबळ कुटुंबीयांचा नांदगाव विधानसभा मतदार संघावर खूप प्रभाव आहे. पंकज भुजबळ दोन वेळा निवडून आले होते, मात्र २०२९ च्या निवडणुकीत त्यांना पराभव पत्करावा लागला. या पराभवानंतर देखील भुजबळ कुटुंबियांनी या मतदार संघात आपली राजकीय उपस्थिती कायम ठेवली आहे.
यावेळी समीर भुजबळ यांची उमेदवारी कोणत्या पक्षातून होणार याबाबत अजूनही संभ्रम आहे. ते अपक्ष म्हणून निवडणूक लढवण्याची शक्यता देखील नाकारता येत नाही. दुसरीकडे, येवला मतदार संघात छगन भुजबळ महायुतीकडून निवडणूक लढवणार आहेत. त्यामुळे भुजबळ कुटुंबीयांची राजकीय हालचाल नेहमीप्रमाणेच चर्चेचा विषय ठरली आहे.
