नाशिक जिल्ह्यातील निफाड विधानसभा मतदारसंघात राष्ट्रवादी काँग्रेसच्या उमेदवारीवर अजूनही निर्णय घेण्यात आलेला नाही. अजित पवार यांच्या नेतृत्वाखालील राष्ट्रवादी काँग्रेसच्या गटाने ३८ जागांसाठी उमेदवारांची पहिली यादी जाहीर केली आहे, त्यामध्ये नाशिक जिल्ह्यातील पाच जागांसाठी विद्यमान आमदारांना पुन्हा एकदा उमेदवारी देण्यात आली आहे. यात येवल्यातून छगन भुजबळ, दिंडोरीत नरहरी झिरवळ, कळवण-सुरगाण्यात नितीन पवार, इगतपुरीत हिरामण खोसकर, आणि सिन्नरमधून माणिक कोकाटे यांचा समावेश आहे. या आमदारांना “सीटिंग-गेटिंग” या फॉर्म्युल्यानुसार तिकिट देण्यात आले असून त्यांचे पक्षात कायम समर्थन आहे.
दररोज महत्वाच्या घडामोडी आणि MBC Marathi च्या संपर्कात राहण्यासाठी आमचा सोशल मीडिया फॉलो करा.
मात्र, निफाडचे विद्यमान आमदार दिलीप बनकर यांच्याबाबत मात्र अद्याप कोणताही निर्णय घेतलेला नाही. दिलीप बनकर हे अजित पवार यांचे कट्टर समर्थक मानले जातात आणि राष्ट्रवादीच्या विभाजनानंतर त्यांनी तत्काळ अजित पवार गटात सहभाग घेतला होता. इतकेच नव्हे तर, भाजप-शिवसेना युतीसोबत महायुतीत जाण्याचा निर्णय घेताना देखील ते अग्रभागी होते. त्यामुळे इतर सर्व आमदारांना उमेदवारी जाहीर झाल्यानंतरही बनकर यांची उमेदवारी अद्याप गुलदस्त्यात का आहे, यावर चर्चा रंगली आहे. महायुतीत निफाडमधील जागेवर निर्णय घेण्यास विलंब का होतो आहे, हा आता राजकीय चर्चेचा मुद्दा बनला आहे.
अशा परिस्थितीत, दिलीप बनकर यांची उमेदवारी जाहीर न झाल्यास त्यांची पुढील भूमिका काय असेल, आणि राष्ट्रवादीच्या अन्य गटाकडून किंवा महायुतीच्या इतर पक्षांकडून त्यांना उमेदवारी देण्याबाबत विचार केला जातो का, याबाबत साशंकता निर्माण झाली आहे.
