चंद्रपूरमध्ये राज्यस्तरीय बॅडमिंटन स्पर्धेचे उद्घाटन: खेळाडूंना वाघासारखा पराक्रम गाजवण्याचे आवाहन
दररोज महत्वाच्या घडामोडी आणि MBC Marathi च्या संपर्कात राहण्यासाठी आमचा सोशल मीडिया फॉलो करा.
चंद्रपूर, दि. ६: महाराष्ट्राच्या “चांदा ते बांदा” ओळखीप्रमाणे चंद्रपूर जिल्हा ही वाघांची भूमी आहे. वाघ हे पराक्रमाचे प्रतीक असल्याने जिल्ह्यातील खेळाडूंनी देखील वाघासारखा पराक्रम गाजवावा, असे आवाहन राज्याचे वने, सांस्कृतिक कार्य, मत्स्यव्यवसाय मंत्री तथा चंद्रपूरचे पालकमंत्री सुधीर मुनगंटीवार (sudhir mungantiwar) यांनी केले. ते चंद्रपूर येथे आयोजित स्व. डॉ. सच्चिदानंद मुनगंटीवार मेमोरीयल महाराष्ट्र मिनी स्टेट बॅडमिंटन (maharastra Mini State badminton)निवड स्पर्धेच्या उद्घाटन समारंभात बोलत होते.
चंद्रपूरमध्ये खेळाडूंसाठी उत्कृष्ट क्रीडा सुविधा निर्माण
चंद्रपूर जिल्ह्यातील खेळाडूंनी राज्य, राष्ट्रीय आणि आंतरराष्ट्रीय पातळीवर यश मिळवावे, यासाठी आपण सातत्याने प्रयत्नशील आहोत, असे सुधीर मुनगंटीवार यांनी सांगितले. जिल्ह्यात बॅडमिंटन कोर्ट, स्टेडियमसह अत्याधुनिक क्रीडा सुविधांची उभारणी करण्यात आली आहे.
जिल्ह्यातील क्रीडा सुविधांचा विस्तार आणि खेळाडूंच्या प्रगतीसाठी प्रयत्न
पालकमंत्री सुधीर मुनगंटीवार यांनी स्पर्धेचे उद्घाटन करताना चंद्रपूर जिल्ह्यात खेळाडूंसाठी अनेक क्रीडा दालने उभारण्याचा निर्धार केला. जिल्ह्यात नुकतीच सैनिक शाळेच्या स्पोर्ट मीटचे यशस्वी आयोजन करण्यात आले होते, याचा संदर्भ देत त्यांनी सांगितले की, आंतरराष्ट्रीय स्तरावर पोहोचण्यासाठी खेळाडूंनी मेहनत आणि जिद्द दाखवली पाहिजे.
आंतरराष्ट्रीय बॅडमिंटन खेळाडू माधवी काशीकर हेडाऊ यांचा सत्कार
कार्यक्रमात आंतरराष्ट्रीय बॅडमिंटन खेळाडू माधवी काशीकर हेडाऊ यांचा पालकमंत्री सुधीर मुनगंटीवार यांच्या हस्ते सत्कार करण्यात आला. यावेळी जिल्हाधिकारी विनय गौडा जी.सी., मुख्य वनसंरक्षक डॉ. जितेंद्र रामगावकर, जिल्हा पोलिस अधीक्षक मुमक्का सुदर्शन, जिल्हा क्रीडा अधिकारी अविनाश पुंड आणि अन्य मान्यवर उपस्थित होते.
ताडोबा व्याघ्र प्रकल्पात मोफत सफारीचा लाभ
चंद्रपूर जिल्ह्यातील खेळाडूंना ताडोबा व्याघ्र (tadoba Vyaghra) प्रकल्पात मोफत सफारी करण्याचा निर्णय सुधीर मुनगंटीवार यांनी जाहीर केला. गेल्या १० वर्षांत पालकमंत्र्यांच्या प्रयत्नांमुळे जिल्ह्यातील विकासकामे वेगाने पूर्ण झाली असून, ताडोबा हा जागतिक स्तरावर ओळखला जातो.
जिल्ह्यात उत्कृष्ट दर्जाच्या क्रीडा सुविधांचा विस्तार
जिल्हाधिकारी विनय गौडा यांनी चंद्रपूर जिल्ह्यात उत्तम दर्जाच्या क्रीडा सुविधा उपलब्ध झाल्याचे सांगितले. चंद्रपूर शहरातील वातानुकूलित बॅडमिंटन हॉल आणि नवीन इनडोअर स्टेडियममध्ये दहा वातानुकूलित बॅडमिंटन कोर्टची उभारणी करण्यात येत आहे.
कार्यक्रमाला मोठ्या प्रमाणात खेळाडूंचा सहभाग
या स्पर्धेत राज्यभरातून ५२० खेळाडू सहभागी झाले असून, खेळाडू, प्रशिक्षक, पालक आणि क्रीडा संघटनांचे पदाधिकारी मोठ्या संख्येने उपस्थित होते. कार्यक्रमाचे संचालन निशा मेहता यांनी केले तर आभारप्रदर्शन जोवेल चांदेकर यांनी मानले.
चंद्रपूर जिल्ह्यात खेळाडूंसाठीच्या सुविधा अधिकाधिक उपलब्ध करून देऊन खेळाडूंना प्रोत्साहन देण्याचे मंत्री सुधीर मुनगंटीवार यांनी आश्वासन दिले आहे.
