नाशिक – अजंग (मालेगाव) येथील निवासी आदिवासी आश्रमशाळेतील विद्यार्थ्यांनी दर्जाहीन अन्न, अस्वच्छता व शिक्षणाच्या अपुऱ्या सुविधांविरोधात आवाज उठवत अन्यत्र स्थलांतर करण्याची मागणी केली होती. या पार्श्वभूमीवर दिंडोरीचे खासदार भास्कर भगरे यांनी मंगळवारी (२४ जून) आदिवासी विकास विभागाच्या अधिकाऱ्यांसोबत विद्यार्थ्यांची बैठक आयोजित केली आणि या प्रकरणाची चौकशी करण्याची मागणी केली.
दररोज महत्वाच्या घडामोडी आणि MBC Marathi च्या संपर्कात राहण्यासाठी आमचा सोशल मीडिया फॉलो करा.
या शाळेत एकूण २५३ विद्यार्थी असून त्यापैकी ५४ विद्यार्थ्यांनी तात्काळ शाळा बदलण्याची मागणी केली आहे. हे विद्यार्थी प्रामुख्याने कलवन, सुरगाणा, पेठ (नाशिक) आणि धुळे जिल्ह्याच्या विविध भागांतील आहेत. अन्न, निवास, स्वच्छता आणि शिक्षण या सुविधा अत्यंत अपुऱ्या असल्यामुळे विद्यार्थ्यांमध्ये असंतोष आहे.
खासदार भगरे यांनी सांगितले की, “या विद्यार्थ्यांनी जानेवारीमध्येच कलवन प्रकल्प अधिकारी यांच्याकडे तक्रार केली होती. त्यानंतर चौकशीही झाली होती आणि नवीन शैक्षणिक वर्षात शाळा बदलून देण्याचे आश्वासन देण्यात आले होते. मात्र जूनमध्ये काहीही घडले नाही. त्यामुळे हे विद्यार्थी सोमवारी कलवनहून नाशिककडे ८४ किमी पायी निघाले.”
भगरे पुढे म्हणाले, “मी याची माहिती घेतल्यानंतर वणी (दिंडोरी) येथे विद्यार्थ्यांना भेटलो आणि आदिवासी विकास विभागाचे अतिरिक्त आयुक्त दिनकर पवार यांच्यासोबत बैठक घेतली. विद्यार्थ्यांसाठी वाहतुकीचीही सोय करण्यात आली.”
सध्या विद्यार्थ्यांचे इतर शाळांमध्ये स्थलांतर करण्याचा प्रस्ताव तयार करण्यात आला असून लवकरच त्याची अंमलबजावणी होईल, असे भगरे यांनी सांगितले. तसेच कलवन प्रकल्प अधिकाऱ्यांनीही स्थलांतरास सहमती दिली असल्यामुळे इतर विद्यार्थ्यांच्याही बाबतीत प्रश्न असल्याची शक्यता व्यक्त केली असून, शाळेच्या व्यवस्थापनावर चौकशी करण्याची मागणी केली आहे.
