“Actor Sayaji Shinde Joins NCP: Takes a Political Step in the Presence of Ajit Pawar”
दररोज महत्वाच्या घडामोडी आणि MBC Marathi च्या संपर्कात राहण्यासाठी आमचा सोशल मीडिया फॉलो करा.
राज्यातील विधानसभेची निवडणूक तोंडावर आल्यामुळे राजकारणात मोठ्या घडामोडी घडत आहेत. निवडणुकीच्या पार्श्वभूमीवर अनेक नेत्यांनी पक्ष बदल करत, मोर्चेबांधणीला वेग दिला आहे. याच अनुषंगाने आज, ११ ऑक्टोबर २०२४ रोजी, ज्येष्ठ अभिनेते सयाजी शिंदे यांनी राष्ट्रवादी काँग्रेस (अजित पवार) पक्षात जाहीर प्रवेश केला आहे. मुंबईत आयोजित पत्रकार परिषदेत उपमुख्यमंत्री अजित पवार, छगन भुजबळ, सुनील तटकरे, आणि प्रफुल्ल पटेल यांच्या उपस्थितीत हा प्रवेश सोहळा पार पडला.
सयाजी शिंदे, ज्यांनी हिंदी, मराठी, तमिळ आणि तेलुगू चित्रपटसृष्टीत आपला ठसा उमटवला आहे, ते आता राष्ट्रवादी काँग्रेस पक्षाचे स्टार प्रचारक म्हणून काम करतील. गेल्या काही वर्षांपासून ते सामाजिक आणि पर्यावरणीय कार्यात सक्रिय होते. त्यांनी सह्याद्री देवराई उपक्रमांतर्गत लाखो झाडे लावली आहेत, ज्यामुळे त्यांच्या सामाजिक कार्याची राज्यभरात चर्चा झाली होती.
छगन भुजबळ यांनी सयाजी शिंदे यांच्या प्रवेशाचे कौतुक करत म्हटले, “आता उद्या दसरा आहे, पण आम्हाला आजच दसरा साजरा करण्याचं भाग्य लाभलं. सयाजी शिंदे हे केवळ अभिनेते नाहीत तर सामाजिक क्षेत्रात मोठं कार्य करणारे नेतेही आहेत. त्यांनी आपल्या कार्याने महाराष्ट्राबाहेरही ओळख निर्माण केली आहे.”
या निवडणुकीच्या तोंडावर अनेक नेते एका पक्षातून दुसऱ्या पक्षात प्रवेश करत आहेत, ज्यामुळे महाराष्ट्रातील राजकारणात नव्या समीकरणांना वेग आला आहे.
