नवी दिल्ली: केंद्रीय अर्थमंत्री निर्मला सीतारमण यांनी आज मोदी सरकारच्या तिसऱ्या कार्यकाळातील दुसरा अर्थसंकल्प Budget 2025 संसदेत सादर केला. या अर्थसंकल्पात सर्वसामान्य नागरिकांसाठी अनेक महत्त्वाचे निर्णय जाहीर करण्यात आले आहेत. विशेषतः १२ लाखांपर्यंतचे उत्पन्न करमुक्त करण्यात आले असून, यामुळे मध्यमवर्गीयांना मोठा दिलासा मिळाला आहे. या निर्णयाचे स्वागत करताना महाराष्ट्राचे मुख्यमंत्री देवेंद्र फडणवीस यांनी अर्थसंकल्पाचे Budget 2025 जोरदार कौतुक केले.
दररोज महत्वाच्या घडामोडी आणि MBC Marathi च्या संपर्कात राहण्यासाठी आमचा सोशल मीडिया फॉलो करा.
मुख्यमंत्री फडणवीस म्हणाले, “देशाचे पंतप्रधान नरेंद्र मोदी आणि केंद्रीय अर्थमंत्री निर्मला सीतारमण यांनी मध्यमवर्गासाठी एक स्वप्नवत असा अर्थसंकल्प Budget 2025 सादर केला आहे. सात लाखांपर्यंत असलेली करमुक्तीची मर्यादा आता थेट १२ लाखांपर्यंत वाढवण्यात आली आहे. यामुळे मध्यमवर्गीय, नोकरदार आणि तरुणांना मोठा दिलासा मिळणार आहे. उत्पन्नात वाढ झाल्यामुळे देशातील मागणी वाढेल आणि सूक्ष्म, लघू व मध्यम उद्योगांना फायदा होईल. यामुळे रोजगार निर्मितीला देखील चालना मिळेल.”
शेती क्षेत्राचा सर्वांगीण विकास साधण्यासाठी सरकारने १०० जिल्ह्यांची निवड करून विशेष विकास योजना आणण्याची घोषणा केली आहे. याशिवाय, केंद्र सरकारने तेलबियांचे उत्पादन हमीभावाने खरेदी करण्याचा निर्णय घेतला आहे, ज्याचा थेट फायदा शेतकऱ्यांना मिळणार आहे. मच्छीमारांसाठीही मोठी घोषणा करण्यात आली असून, त्यांची क्रेडिट मर्यादा ३ लाखांवरून ५ लाखांपर्यंत बिनव्याजी वाढवण्यात आली आहे.
फडणवीस पुढे म्हणाले, “या अर्थसंकल्पात धीराने आणि धाडसाने घेतलेले निर्णय भारताच्या आर्थिक इतिहासातील मैलाचा दगड ठरतील. मध्यमवर्गीयांसाठी करसवलतीच्या निर्णयामुळे त्यांच्या हातात अधिक पैसा राहील, जो अर्थव्यवस्थेतील मागणी वाढवण्यास मदत करेल. यामुळे उत्पादन क्षेत्राला गती मिळेल आणि देशाची अर्थव्यवस्था अधिक सक्षम बनेल.”
या अर्थसंकल्पामुळे Budget 2025 देशातील मध्यमवर्गीयांना मोठा आधार मिळेल, तर शेतकरी व मच्छीमार वर्गालाही महत्त्वाचा दिलासा मिळणार आहे. मोदी सरकारचा हा अर्थसंकल्प केवळ आकड्यांचा खेळ नसून, सर्वसामान्य नागरिकांना प्रगतीचा नवा मार्ग दाखवणारा आहे, असे मत अनेक तज्ज्ञांनी व्यक्त केले आहे.
