Latest News : महाराष्ट्र सरकारने महिलांना आर्थिकदृष्ट्या सक्षम करण्यासाठी मुख्यमंत्री माझी लाडकी बहीण योजना सुरू केली आहे. या योजनेसाठी ४६ हजार कोटी रुपयांची तरतूद करण्यात आली आहे. आतापर्यंत या योजनेतून राज्यातील २ कोटी २६ लाखांहून अधिक महिलांच्या खात्यात दरमहा १५०० रुपये जमा केले गेले आहेत. या योजनेचा उद्देश आर्थिकदृष्ट्या दुर्बल महिला, विशेषतः २१ ते ६५ वर्षे वयोगटातील, अडीच लाखांपर्यंत वार्षिक उत्पन्न असलेल्या महिलांना मदत करणे हा आहे.
दररोज महत्वाच्या घडामोडी आणि MBC Marathi च्या संपर्कात राहण्यासाठी आमचा सोशल मीडिया फॉलो करा.
सरकारकडून जुलै महिन्यापासून योजनेच्या हप्त्यांचे पैसे जमा करण्यात आले असून, सप्टेंबरपर्यंतचे हप्ते देण्यात आले आहेत. त्याचबरोबर, ऑक्टोबर व नोव्हेंबर महिन्यांचे पैसे एकत्रितपणे जमा करण्यात येणार असल्याचे सांगितले जाते.
योजनेच्या संदर्भात, काही वृत्तसंकेतस्थळांनी महिलांना दिवाळी बोनस मिळणार असल्याची माहिती दिली होती. यानुसार, निवडक महिलांना अजून अडीच हजार रुपयांचा बोनस मिळणार असल्याची अफवा पसरली होती. मात्र, महिला आणि बालविकास मंत्री आदिती तटकरे यांच्या कार्यालयाकडून या वृत्तांचा इन्कार करण्यात आला आहे. त्यांच्या कार्यालयाने स्पष्ट केले की, सरकारने लाडकी बहीण योजनेतील पात्र महिलांना कोणताही दिवाळी बोनस जाहीर केलेला नाही. तसेच, मोबाईल गिफ्ट देण्याच्या चर्चाही आधारहीन आहेत.
या संदर्भात अधिकृत माहिती घेण्यासाठी, सरकारच्या अधिकृत संकेतस्थळावर जाऊन खातरजमा करण्याचा सल्ला दिला जात आहे, कारण काही अफवांमुळे आर्थिक फसवणुकीची शक्यता आहे.
महाराष्ट्र सरकारकडून लाडकी बहीण योजनेतील लाभार्थींना योग्य ती मदत मिळावी यासाठी विशेष प्रयत्न केले जात आहेत. तथापि, दिवाळी बोनस किंवा इतर कोणत्याही लाभाच्या घोषणांना खात्रीशीर माहिती न घेतल्याशिवाय विश्वास ठेवणे योग्य नाही.
