नाशिक, १३ सप्टेंबर २०२४: यंदाच्या अनंत चतुर्दशीच्या गणेश विसर्जन आणि ईद-ए-मिलाद-उन-नबी हे दोन महत्त्वाचे सण एकाच दिवशी, गुरुवारी साजरे होत असल्याने नाशिक शहर पोलिसांनी मोठ्या प्रमाणात सुरक्षा उपाययोजना केल्या आहेत. शहरात शांतता आणि सुव्यवस्था राखण्यासाठी कडेकोट बंदोबस्त तैनात करण्यात आला आहे. ४०० हून अधिक गुन्हेगारांना प्रतिबंधक कारवाईच्या अंतर्गत शहराबाहेर हद्दपार करण्यात आले आहे.नाशिक पोलीस आयुक्तालयाने दिलेल्या माहितीनुसार, सणांच्या निमित्ताने शहरात मोठ्या प्रमाणात नागरिकांची गर्दी होण्याची शक्यता आहे. या पार्श्वभूमीवर ३००० हून अधिक पोलीस कर्मचारी, राज्य राखीव पोलीस दल (SRPF), होमगार्ड, आणि दंगल नियंत्रण पथके यांची विविध ठिकाणी तैनाती करण्यात आली आहे. सर्व १३ पोलीस ठाण्यांच्या हद्दीत रूट मार्च सुरू करण्यात आले आहे, ज्याचे नेतृत्व वरिष्ठ पोलीस अधिकारी करत आहेत.शहरात कोणताही अनुचित प्रकार घडू नये यासाठी २०० हून अधिक सीसीटीव्ही कॅमेरे आणि ड्रोनद्वारे सतत लक्ष ठेवण्यात येणार आहे. तसेच, गणेश विसर्जन मिरवणूक मार्गावरील संवेदनशील ठिकाणांवर विशेष देखरेख ठेवली जात आहे.पोलीस आयुक्तालयाने नागरिकांना शांतता राखून दोन्ही सण साजरे करण्याचे आवाहन केले आहे. कोणत्याही अफवांवर विश्वास ठेवू नये आणि शंकास्पद हालचाली आढळल्यास तात्काळ पोलिसांशी संपर्क साधावा, असेही पोलिसांनी सांगितले आहे.
दररोज महत्वाच्या घडामोडी आणि MBC Marathi च्या संपर्कात राहण्यासाठी आमचा सोशल मीडिया फॉलो करा.
