Nashik : सतत वाढणाऱ्या सोनसाखळी चोरीच्या घटनांवर तीव्र नाराजी व्यक्त करत महाराष्ट्र नवनिर्माण सेनेने (MNS) उपनगर पोलीस ठाण्याचे निरीक्षक सुयोग वायकर यांना निवेदन दिले. चोरट्यांना लवकरात लवकर शोधून कठोर कारवाई करण्याची मागणी मनसेने केली असून, अन्यथा साखळी उपोषण करण्याचा इशारा दिला आहे.
दररोज महत्वाच्या घडामोडी आणि MBC Marathi च्या संपर्कात राहण्यासाठी आमचा सोशल मीडिया फॉलो करा.
सतत होणाऱ्या चोरीचे हॉटस्पॉट आणि नागरिकांच्या समस्या
निवेदनानुसार जयभवानी रोड, के.जे मेहता स्कूल, सद्गुरू नगर, कमला पार्क हे सोनसाखळी चोरीचे मुख्य हॉटस्पॉट बनले आहेत. मागील दोन महिन्यांत १० ते १५ चोऱ्या झाल्याचे नमूद करण्यात आले, ज्यामुळे महिलांच्या सुरक्षेचा प्रश्न गंभीर झाला आहे. या चोऱ्यांमध्ये सुमारे ७-८ लाख रुपये किमतीचे सोने चोरीला गेले आहे.
सीसीटीव्हीमध्ये दिसणाऱ्या चोरांवर पोलिसांचा वचक नाही
निवेदनात म्हटले आहे की, सीसीटीव्ही फुटेजमध्ये चोर स्पष्टपणे काळ्या जॅकेटमध्ये, पांढऱ्या बूट घालून काळ्या रंगाच्या मोटारसायकलवरून जाताना दिसतात. विशेषतः ६० वर्षांवरील वृद्ध महिलांना लक्ष्य केले जात आहे. दिवसा १२:३० वाजताही चोरांच्या धाडसामुळे नागरिक भयभीत झाले आहेत.
मनसेच्या मागण्या
नाशिक शहर उपाध्यक्ष अ‍ॅड. नितीन पंडित यांनी चोरट्यांना पकडण्यासाठी खालील मागण्या मांडल्या:
- फिरते गस्त वाढवावी.
- संशयास्पद व्यक्तींवर विशेष लक्ष ठेवावे.
- सोनारांना सतर्क करून चोरीच्या सोन्याचा व्यवहार रोखावा.
- सीसीटीव्ही फुटेजच्या आधारे काळ्या जॅकेट आणि सफेद बूट घालून काळ्या बाईकवर फिरणाऱ्या चोरांचा शोध घ्यावा.
मनसेचे नेते आणि कार्यकर्त्यांची उपस्थिती
निवेदन देताना मनसेचे नाशिक शहर उपाध्यक्ष अ‍ॅड. नितीन पंडित, विभाग अध्यक्ष बंटी कोरडे, जिल्हा उपाध्यक्ष संतोष सहाणे, पक्ष निरीक्षक प्रमोद साखरे, वाहतूक सेनेचे मयूर कुकडे, आणि महिला विभाग प्रमुख मीरा आवारे यांसह अनेक कार्यकर्ते उपस्थित होते.
मनसेने इशारा दिला आहे की, जर लवकरात लवकर या चोरांना पकडण्यात आले नाही, तर पक्ष आंदोलनाच्या मार्गावर उतरेल आणि साखळी उपोषणाला सुरुवात करेल.
He Pan Wacha : “सत्ताधारी आणि निषेधकर्ते? उड्या मारून प्रायश्चित्त घ्या – राज ठाकरेंचा खळबळजनक इशारा”
