Latest News: विधानसभा निवडणुकीसाठी महाराष्ट्र नवनिर्माण सेनेने पहिली यादी जाहीर केली आहे. भाजप आपली पहिली यादी जाहीर केल्यानंतर अवघ्या एका दिवसाने मनसेनेही आपले उमेदवार जाहीर केले आहेत. राज ठाकरे यांनी डोंबिवली येथे बोलताना कल्याण ग्रामीण मतदारसंघातून राजू पाटील आणि ठाणे मतदारसंघातून अविनाश जाधव यांच्या उमेदवारीची घोषणा केली. येत्या २४ तारखेला हे दोघे उमेदवारी अर्ज भरतील, असे त्यांनी सांगितले.
दररोज महत्वाच्या घडामोडी आणि MBC Marathi च्या संपर्कात राहण्यासाठी आमचा सोशल मीडिया फॉलो करा.
लोकसभा निवडणुकीच्या वेळी मनसेने भाजप-शिवसेना (शिंदे गट) महायुतीला बिनशर्त पाठिंबा दिला होता. मात्र आता विधानसभा निवडणुकीसाठी मनसेने स्वतंत्र भूमिका घेऊन महायुतीपासून दूर राहत एकहाती निवडणुका लढवण्याचा निर्णय घेतला आहे.
कल्याण ग्रामीण मतदारसंघात विद्यमान आमदार राजू पाटील यांच्यावर मोठी जबाबदारी आहे. लोकसभा निवडणुकीत त्यांनी खा. डॉ. श्रीकांत शिंदे यांना मदत करून महायुतीला या भागात मोठे मताधिक्य मिळवून दिले होते. मात्र आता, महायुतीपासून मनसे वेगळी झाल्यामुळे पाटील यांना या निवडणुकीत एकाकी लढत द्यावी लागणार आहे.
कल्याण ग्रामीणमध्ये राजू पाटील यांची लढत शिवसेना उद्धव बाळासाहेब ठाकरे गटाचे सुभाष भोईर आणि शिंदे गटाचे राजेश मोरे यांच्याशी होणार आहे. भाजपमधूनही नंदू परब उमेदवारीसाठी प्रयत्नशील आहेत.
ही निवडणूक राजू पाटील यांची दुसरी निवडणूक आहे. यापूर्वीच्या निवडणुकीत त्यांनी दिवा भागाच्या जोरावर सुमारे ६ ते ७ हजार मतांच्या फरकाने विजय मिळवला होता. मात्र यावेळी राजकीय परिस्थिती बदलली आहे, आणि त्यामुळे ही लढत अधिक चुरशीची होणार आहे.
मनसेने लोकसभा निवडणुकीत महायुतीला पाठिंबा दिला होता, पण आता विधानसभा निवडणुकीसाठी एकट्याने लढण्याचा निर्णय घेतल्यामुळे राजकीय समीकरणे बदलली आहेत. शिवसेनेचे दोन्ही गट, मनसे, आणि भाजपमध्ये तिरंगी लढत होण्याची शक्यता आहे, विशेषत: कल्याण ग्रामीणसारख्या मतदारसंघात, जिथे प्रत्येक उमेदवाराची ताकद आणि युक्ती निर्णायक ठरणार आहे.
