एक्स १० फायनान्शियल सर्व्हिसेसवर RBI ची मोठी कारवाई, कंपनीची नोंदणी रद्द
रिझर्व्ह बँक ऑफ इंडियाने (RBI) नॉन-बँकिंग फायनान्शियल कंपनी (NBFC) एक्स १० फायनान्शियल सर्व्हिसेस लिमिटेड यांच्यावर कठोर कारवाई करत कंपनीचे नोंदणी प्रमाणपत्र (COR) रद्द केले आहे. कंपनीने आपल्या डिजिटल लोन ऑपरेशनमध्ये आचारसंहितेचे उल्लंघन केल्याचा ठपका ठेवण्यात आला आहे.
दररोज महत्वाच्या घडामोडी आणि MBC Marathi च्या संपर्कात राहण्यासाठी आमचा सोशल मीडिया फॉलो करा.
कंपनीच्या अनियमिततेची कारणे
एक्स १० फायनान्शियल सर्व्हिसेस लिमिटेडने कर्ज पुरवठ्यासाठी व्हीकॅश टेक्नॉलॉजी, एक्सएनपी टेक्नॉलॉजी, यारलुंग टेक्नॉलॉजी अशा विविध मोबाईल अॅप्सच्या माध्यमातून ग्राहकांशी व्यवहार केले. कर्ज मंजुरीसाठी अत्यावश्यक असलेल्या क्रेडिट असेसमेंट, व्याजदर निश्चिती आणि केवायसी व्हेरिफिकेशनसारख्या कामांसाठी बाह्य सेवा प्रदात्यांवर (Service Providers) अवलंबून राहण्यामुळे अनेक अनियमितता उघड झाल्या.
कायमची नोंदणी रद्द
RBI च्या म्हणण्यानुसार, या कंपनीने सेवा प्रदात्यांकडून वित्तीय व्यवहारांची योग्य ती चौकशी न केल्यामुळे ग्राहकांचे हित धोक्यात आले. या पार्श्वभूमीवर RBI ने कंपनीच्या नोंदणीवर स्थगिती न आणता कायमची रद्दीकरण प्रक्रिया पूर्ण केली. पूर्वी ‘अभिषेक सिक्युरिटीज लिमिटेड’ म्हणून ओळखली जाणारी ही कंपनी जून २०१५ मध्ये NBFC म्हणून नोंदणीकृत करण्यात आली होती.
लघु वित्त बँकांसाठी RBI च्या समितीत पुनर्रचना
दरम्यान, रिझर्व्ह बँकेने सार्वत्रिक आणि लघु वित्त बँकांच्या अर्जांचे मूल्यमापन करण्यासाठी स्थायी बाह्य सल्लागार समितीची (SESC) पुनर्रचना केली आहे. या पाच सदस्यीय समितीचे अध्यक्ष रिझर्व्ह बँकेचे माजी डेप्युटी गव्हर्नर एम.के. जैन असतील.
समितीचे इतर सदस्य
समितीमध्ये रेवती अय्यर, पार्वती व्ही सुंदरम, हेमंत जी कॉन्ट्रॅक्टर, आणि एन.एस. कन्नन यांचा समावेश आहे. ही समिती बँक परवान्यांसाठी पात्र अर्जांची प्राथमिक छाननी व मूल्यमापन करणार आहे.
ग्राहकांसाठी संदेश
RBI च्या या निर्णयामुळे NBFC क्षेत्रातील नियम व शिस्तीवर भर दिला जाणार आहे. ग्राहकांनी कर्ज घेण्यापूर्वी कंपन्यांच्या प्रामाणिकतेची खातरजमा करणे आवश्यक असल्याचे तज्ज्ञांचे मत आहे.
