Sharad Pawar’s Strong Response: “This Old Man Won’t Stop, Even at 90” – A Sharp Rebuke to Ajit Pawar
दररोज महत्वाच्या घडामोडी आणि MBC Marathi च्या संपर्कात राहण्यासाठी आमचा सोशल मीडिया फॉलो करा.
Latest News : महाराष्ट्रातील राजकारणात पुन्हा एकदा शरद पवार (Sharad Pawar) आणि अजित पवार (Ajit Pawar) यांच्यातील तणाव चर्चेत आला आहे. जुलै २०२३ मध्ये, अजित पवारांनी शरद पवार यांच्याशी फारकत घेत महायुतीत सामील झाल्याने राजकीय वर्तुळात खळबळ उडाली होती. त्यानंतर अजित पवारांनी ५ जुलै २०२३ रोजी केलेल्या भाषणात शरद पवारांच्या वयावर टीका केली होती. “वय ८१ झालं, ८२ झालं, तुम्ही थांबणार की नाही? आम्ही काम करतो, तुम्ही मार्गदर्शन करा,” असे विधान करत अजित पवारांनी आपल्या काकांना एकप्रकारे राजकीय निवृत्तीचा सल्ला दिला होता.
शरद पवारांचं जोरदार प्रत्युत्तर
अजित पवारांच्या या वक्तव्यावर शरद पवारांनी आता कडवट उत्तर दिलं आहे. एका जाहीर सभेत शरद पवारांनी स्पष्ट केलं की, “माझं वय ९० झालं तरी हे म्हातारं काही थांबणार नाही.” त्यांनी सांगितलं की, आपल्यापुढे असलेला महत्त्वाचा प्रश्न म्हणजे महाराष्ट्र कुणाच्या हाती द्यायचा? सामान्य लोकांच्या हातात द्यायचा की राजकीय स्वार्थ साधणाऱ्यांच्या?
बारामतीचं उदाहरण देत शहाणपणाचं कौतुक
आपल्या भाषणात शरद पवारांनी बारामतीचा संदर्भ देत लोकांच्या शहाणपणाचं कौतुक केलं. “तिथे एक बहीण निवडणुकीला उभी होती. निवडणूक प्रचाराच्या वेळी बारामतीकर गप्प बसलेले दिसले. पण मतमोजणी झाली तेव्हा ती बहिण १ लाख ६० हजार मतांनी विजयी झाली. लोक राजकारण्यांपेक्षा जास्त शहाणे आहेत. त्यांना कुणासाठी मतदान करायचं हे चांगलं कळतं,” असे शरद पवार म्हणाले.
अजित पवारांच्या वक्तव्याला प्रत्युत्तर
शरद पवारांनी आपल्या वयावर झालेल्या टीकेलाही हलक्याफुलक्या शैलीत उत्तर दिलं. “आत्ता काही तरुण मुलं माझा फोटो असलेला बोर्ड घेऊन उभी होती. त्यावर लिहिलं होतं, ‘८४ वर्षांचा म्हातारा’. पण तुम्ही काही काळजी करू नका. अजून लांब बघायचं आहे. ८४ होवो किंवा ९०, हे म्हातारं थांबत नाही. महाराष्ट्राला योग्य मार्गावर आणल्याशिवाय हे म्हातारं स्वस्थ बसणार नाही,” असे त्यांनी ठामपणे सांगितले.
महाराष्ट्रातील सत्तेबाबत शरद पवारांचं चिंतन
शरद पवारांनी आपल्या भाषणात महाराष्ट्राच्या भवितव्याचा मुद्दा उपस्थित केला. त्यांनी सत्ताधारी पक्षांवर टीका करत सांगितलं की, सध्या महाराष्ट्रात नव्या योजना जाहीर केल्या जात आहेत, पण त्या योजना जनतेच्या हितासाठी आहेत की राजकीय फायद्यासाठी, हे महत्त्वाचं आहे. विशेषत: बहिणींच्या सन्मानाबाबत भाष्य करत, मागील काही वर्षांत बहिणींची आठवण कशी झाली नाही, असा सवाल पवारांनी उपस्थित केला.
शरद पवारांच्या वक्तव्याचं महत्त्व
शरद पवारांच्या या भाषणानंतर राजकीय वर्तुळात चर्चेला उधाण आलं आहे. त्यांच्या स्पष्टवक्तेपणामुळे आणि आत्मविश्वासाने दिलेल्या प्रत्युत्तरामुळे त्यांचा अजूनही प्रभाव कायम असल्याचं दिसत आहे. त्यांच्या वयावर झालेली टीका त्यांनी सहजपणे घेतली असली तरीही महाराष्ट्राच्या राजकारणात त्यांची भूमिका अद्याप महत्त्वाची आहे, हे त्यांनी पुन्हा एकदा सिद्ध केलं आहे.
