नाशिक (२ जुलै २०२५): Steel Industry Shutdown Nashik
नाशिक जिल्ह्यातील स्टील उत्पादक कंपन्यांनी वीज दरवाढीच्या विरोधात आक्रमक पवित्रा घेत मंगळवारपासून (१ जुलै) कामबंद आंदोलन सुरू केले आहे. सातपूर, अंबड, सिन्नर व दिंडोरी औद्योगिक वसाहतीतील १० स्टील कंपन्या बंद करण्यात आल्या असून, काही कंपन्यांनी पूर्ण उत्पादन थांबवले आहे, तर काहींनी अर्ध्या क्षमतेने काम सुरू ठेवले आहे.
उत्पादन थांबल्यामुळे उद्योगांना व महावितरणला फटका
- दिवसाला १,००० टन स्टील उत्पादन थांबले
- दररोज ८ लाख युनिट वीज न वापरल्यामुळे महावितरणला ८० लाख रुपयांचे नुकसान
- महिन्याला १०० कोटींपर्यंत आर्थिक नुकसान होण्याची शक्यता
- १,००० कामगारांचा रोजगार धोक्यात
- शासनाचा १८ टक्के जीएसटी महसूलही बुडण्याची शक्यता
उद्योगधंद्यांना वीज दरवाढीचा ‘शॉक’ – आंदोलनास कारण (Steel Industry Shutdown Nashik)
सद्यस्थितीत कंपन्यांचे वीज बिल दरमहा ७–८ कोटी रुपयांपर्यंत पोहोचले आहे. दरवाढीनंतर यात १० टक्के वाढ होऊन ७०–८० लाखांचा अतिरिक्त भार पडला आहे. स्टील उद्योग २४ तास कार्यरत असल्यामुळे वीज दर हे उत्पादन खर्चावर थेट परिणाम करत आहेत.
उद्योग संघटनांची मागणी आहे की, महाराष्ट्रातील वीज दर शेजारील राज्यांप्रमाणे सुसंगत करावेत, मात्र २०१६ पासून मागणीकडे दुर्लक्ष झाल्याचे उद्योजकांचे म्हणणे आहे.
फक्त १० कंपन्या उरल्या कार्यरत
२०१६ पर्यंत जिल्ह्यात ३१ स्टील कंपन्या कार्यरत होत्या. मात्र, वीज दरवाढ व इतर धोरणांमुळे २१ कंपन्या बंद पडल्या, आणि आता फक्त १० कंपन्याच उरल्या आहेत. या कंपन्यांमधूनच सध्या वीज दरवाढीविरोधात आंदोलन करण्यात येत आहे.
कामगारांचा रोजगार धोक्यात
सध्या १,००० कामगार या उद्योगात कार्यरत असून, काम बंद असतानाही कंपन्यांनी तात्पुरते वेतन दिले आहे. मात्र, पुढील दोन-तीन दिवसांत वेतनबाबत निर्णय घेतला जाणार असल्याचे संकेत देण्यात आले आहेत.
मुख्यमंत्र्यांच्या भेटीची अपेक्षा, पण अधिवेशन आडवे
उद्योजकांना मुख्यमंत्री यांची भेट घेऊन समस्या मांडायची आहे. मात्र, सध्या पावसाळी अधिवेशन सुरू असल्याने भेटीबाबत अनिश्चितता निर्माण झाली आहे.
शासन वीजदर ठरवताना चर्चा करेल का?
महावितरण अधिकाऱ्यांच्या मते, “स्टील उद्योजकांनी कोणत्या वीजदराला विरोध आहे याची स्पष्टता आणावी. चर्चा केली, तर तोडगा निघू शकतो. अन्य मोठ्या उद्योगांनी मात्र कंपन्या बंद केलेल्या नाहीत.”
