पोलिसांची कारवाई आणि मनपाची नोटिसा मोहीम सुरू
Youth Under Police Radar : युवक-युवतींना खासगीपणा देणाऱ्या आणि तासाने सुविधा पुरवणाऱ्या ५२ कॅफेंची यादी पोलिसांनी नाशिक महापालिकेला सादर केली आहे. या कॅफेंमध्ये बेकायदेशीर बांधकामे व संशयास्पद हालचाली होत असल्याने मनपाने कॅफे चालकांना नोटिसा बजावण्यास सुरुवात केली आहे.
दररोज महत्वाच्या घडामोडी आणि MBC Marathi च्या संपर्कात राहण्यासाठी आमचा सोशल मीडिया फॉलो करा.
गंगापूररोडवरील कॅफेवर छापा, गैरप्रकार उघड (Youth Under Police Radar)
गेल्या आठवड्यात गंगापूररोडवरील विद्या विकास सर्कलजवळील एका कॅफेत गैरप्रकार सुरू असल्याची तक्रार आमदार देवयानी फरांदे यांच्याकडे आली होती. त्यांनी त्वरित पोलिसांना कळवले आणि छापा टाकण्यात आला. तपासणी दरम्यान, कॅफेमध्ये खासगी टेबलांना पडदे लावून, अंधुक प्रकाशात प्रणय चाळे करण्याची सोय करण्यात आल्याचे उघडकीस आले.
पोलिसांकडून ५२ कॅफेंची यादी मनपाला सुपूर्द (52 Cafes Providing Special Arrangements for Youth Under Police Radar)
प्रथम, पोलिसांनी २० कॅफेंची यादी महापालिकेला दिली होती. मात्र, पुढील तपासात हा आकडा ५२ पर्यंत वाढला. यामध्ये गंगापूररोड, कॉलेजरोड, महात्मानगर आणि अशोका मार्ग येथील अनेक कॅफेंचा समावेश आहे. विशेषतः, गंगापूररोड आणि कॉलेजरोडवर मोठ्या प्रमाणावर अशा कॅफे चालू असल्याचे निदर्शनास आले आहे.
गुन्हेगारी कारवाईऐवजी महापालिकेकडे जबाबदारी?
गंगापूररोडवरील कॅफेवर झालेल्या कारवाईदरम्यान, पोलिसांनी IPC २९६, २८०, ५४(३)(५), ११० अंतर्गत गुन्हा दाखल केला आहे. मात्र, या प्रकरणात फौजदारी कारवाई टाळून महापालिकेकडे अतिक्रमणविरोधी कारवाई करण्याची जबाबदारी टाकण्यात आल्याने आश्चर्य व्यक्त केले जात आहे.
महापालिकेची पुढील कारवाई
महापालिकेचे कार्यकारी अभियंता संदीप जाधव यांच्या माहितीनुसार, यादीनुसार कॅफेंची तपासणी सुरू आहे. या कॅफेंना बेकायदेशीर बांधकामांबद्दल नोटिसा बजावण्यात आल्या असून, १५ दिवसांत उत्तर देण्याची संधी देण्यात आली आहे. त्यानंतर योग्य ती कारवाई केली जाईल.
नाशिकमधील कॅफेंवर प्रशासनाची करडी नजर
नाशिकमध्ये युवकांसाठी खास व्यवस्था असलेल्या अशा कॅफेंची संख्या वाढत असून, यावर कडक नियंत्रण ठेवण्याची आवश्यकता आहे. प्रशासनाच्या वतीने कडक कारवाई करण्यात येणार का, हे पाहणे महत्त्वाचे ठरणार आहे!
