नाशिक : निफाड तालुक्यातील तामसवाडीतील शेतकरी कुटुंबातील वैभव वाल्मीक शिंदे (Vaibhav Shinde) या युवकाने ४४ दिवसांत काश्मीर ते कन्याकुमारी हे ४,११२ किलोमीटरचे अंतर धावत पूर्ण करत ‘गिनिज बुक ऑफ वर्ल्ड रेकॉर्ड’मध्ये नोंद केली आहे. या अद्वितीय कामगिरीमुळे नाशिकचे नाव जागतिक स्तरावर झळकले असून मराठा विद्याप्रसारक समाजाच्या शैक्षणिक परंपरेचा नावलौकिक वाढविला आहे.
दररोज महत्वाच्या घडामोडी आणि MBC Marathi च्या संपर्कात राहण्यासाठी आमचा सोशल मीडिया फॉलो करा.
Vaibhav Shinde जागतिक विक्रमाची प्रेरणा
वैभवने प्राथमिक आणि माध्यमिक शिक्षण मविप्रच्या शाळांमधून पूर्ण केले. धावण्याच्या क्षेत्रात काही काळ थांबावं लागल्यानंतर दिल्लीतील प्रशिक्षक सुफिया खान यांच्या मार्गदर्शनाखाली त्याने पुन्हा प्रशिक्षणाला सुरुवात केली. त्यांच्या प्रेरणेने वैभवने जागतिक विक्रम करण्याचा निश्चय केला आणि सायकलिस्ट डॉ. महेंद्र महाजन यांच्या मार्गदर्शनाखाली तयारी केली.
११ नोव्हेंबर २०२४ पासून सुरूवात
वैभवने (Vaibhav Shinde) ११ नोव्हेंबर २०२४ रोजी श्रीनगरमधील लाल चौकातून सकाळी ७:५१ वाजता आपला प्रवास सुरू केला. ४४ दिवसांत दररोज सरासरी १०० किलोमीटर अंतर धावत त्याने हा विक्रम पूर्ण केला. वैभवने १२ राज्ये आणि ११० हून अधिक शहरांतून प्रवास केला.
आधीच्या विक्रमांची तुलना
२०१९ मध्ये हरियाणाच्या संजयकुमार आणि रतनकुमार यांनी हेच अंतर ५२ दिवस ४ तास ४० मिनिटांत पूर्ण केले होते. महिला गटात दिल्लीच्या सुफिया सुफी यांनी ८७ दिवसांत हे अंतर पूर्ण केले होते. वैभवने हे अंतर केवळ ४४ दिवस १७ तास १५ मिनिटांत पूर्ण करून इतिहास घडविला.
सामाजिक आणि मानवी मूल्यांचा अनुभव
वैभवच्या प्रवासात विविध ठिकाणच्या लोकांनी मदत केली. शेतकऱ्यांनी दूध आणि अन्न देऊन त्याच्या मोहिमेला पाठिंबा दिला. वैभवने माणुसकीच्या भावना अनुभवल्या आणि ग्रामीण तरुणांसाठी प्रेरणा ठरला.
“शेतकरी कुटुंबातून असूनही मी मोठं स्वप्न पाहिलं. जिद्द आणि मेहनतीने काहीही अशक्य नाही,” असे वैभवने सांगितले.
संस्थेचा गौरव
मराठा विद्याप्रसारक समाजाचे सरचिटणीस अॅड. नितीन ठाकरे यांनी सांगितले की, “वैभवची कामगिरी संस्थेसाठी गौरवाची आहे. इतर विद्यार्थ्यांसाठीही ही प्रेरणादायी आहे.”
वैभवच्या या विश्वविक्रमामुळे नाशिकचे नाव जागतिक पातळीवर उजळले असून, त्याची ही कामगिरी भारतातील तरुणांसाठी दीपस्तंभ ठरणार आहे.
