लासलगाव (नाशिक) Stray Dogs Attack
लासलगाव शहरातील गणेशनगर परिसरात मोकाट कुत्र्यांनी दहशत माजवली असून सोमवारी (दि. 11) दुपारी तीन वर्षांच्या आरोही विशाल जाधव या चिमुकलीवर भटक्या कुत्र्यांच्या टोळीने अचानक हल्ला केला. चिमुकलीच्या आरडाओरडीनंतर स्थानिक नागरिकांनी तातडीने धाव घेत तिची सुटका केली.
जखमी अवस्थेत तिला लासलगाव ग्रामीण रुग्णालयात दाखल करण्यात आले, जिथे रेबीजचे इंजेक्शन दिल्यानंतर तिला पुढील उपचारासाठी नाशिक जिल्हा रुग्णालयात हलवण्यात आले.
प्रशासनाकडे वारंवार तक्रारी, तरीही कुत्र्यांचा बंदोबस्त नाही
लासलगावमध्ये मोकाट कुत्र्यांची संख्या सतत वाढत असून, वारंवार हल्ल्याच्या घटना घडत आहेत. नागरिकांनी ग्रामसेवक आणि ग्रामपंचायतीला लेखी निवेदन देऊन उपाययोजना करण्याची मागणी केली आहे. मात्र, अद्याप ठोस पावले उचलली गेलेली नाहीत, परिणामी महिला, लहान मुले आणि वृद्ध नागरिक भीतीत आहेत.
ठळक मुद्दे:
- गणेशनगर परिसरात भटक्या कुत्र्यांची दहशत
- 3 वर्षीय आरोही विशाल जाधव हल्ल्यात जखमी
- नागरिकांची ग्रामपंचायतीकडे वारंवार तक्रार, तरीही कार्यवाही शून्य
पशुवैद्यकीय तज्ज्ञांचे मार्गदर्शन:
- मोकाट कुत्र्यांचे निर्बीजीकरण व लसीकरण तातडीने राबवावे.
- शहरी वस्तीमध्ये कुत्रे पकड मोहीम सातत्याने सुरू ठेवावी.
- नागरिकांनी रस्त्यावर अन्न देणे टाळावे, जेणेकरून कुत्र्यांचा वावर कमी होईल.
पालकांसाठी सूचना: (Stray Dogs Attack)
- लहान मुले आणि वयोवृद्धांना एकटे बाहेर पाठवू नका.
- मुलांना गल्लीबोळात भटक्या कुत्र्यांच्या जवळ जाण्यापासून रोखा.
- हल्ल्यानंतर जखमीला तातडीने रुग्णालयात दाखल करून अँटी-रेबीज लस द्या.
