सोलापूर: भीमा उजनी प्रकल्पांतर्गत देगाव शाखा कालवा वितरिका क्रमांक एक आणि दोनच्या 352 कोटी रुपयांच्या कामांचे भूमिपूजन उपमुख्यमंत्री देवेंद्र फडणवीस यांच्या हस्ते करण्यात आले. या महत्त्वपूर्ण प्रकल्पामुळे दक्षिण सोलापूर तालुक्यातील दहा गावे आणि अक्कलकोट तालुक्यातील 25 गावे सिंचनाखाली येणार असून, एकूण 16,129 हेक्टर जमीन सिंचनासाठी उपलब्ध होईल. या विकास कामांमुळे शेतकऱ्यांचे जीवनमान उंचावण्याची अपेक्षा आहे.
दररोज महत्वाच्या घडामोडी आणि MBC Marathi च्या संपर्कात राहण्यासाठी आमचा सोशल मीडिया फॉलो करा.
अक्कलकोट येथे विविध विकास कामांचे भूमिपूजन आणि उजनीचे पाणी कुरनूर धरणात आल्याचा जलपूजन सोहळा यावेळी आयोजित करण्यात आला होता. उपमुख्यमंत्री देवेंद्र फडणवीस यांच्या उपस्थितीत माजी खासदार जयसिद्धेश्वर महास्वामी, आमदार सुभाष देशमुख, आमदार सचिन कल्याणशेट्टी, समाधान आवताडे, राम सातपुते, माजी आमदार प्रशांत परिचारक आणि इतर मान्यवर उपस्थित होते.
भीमा उजनी प्रकल्पाचा शेतकऱ्यांना लाभ
फडणवीस यांनी सांगितले की, या प्रकल्पामुळे दक्षिण सोलापूर आणि अक्कलकोट तालुक्यांना 27 वर्षांपासून प्रलंबित असलेल्या पाण्याचा प्रश्न मार्गी लागेल. या दोन्ही तालुक्यांमधील शेतकऱ्यांना पाणीपुरवठा होणार असून त्यांची शेती समृद्ध होईल. यासोबतच अक्कलकोटच्या सर्वांगीण विकासासाठी शासन कटिबद्ध असल्याचे त्यांनी नमूद केले.
सौर कृषी वाहिनी योजना
राज्य शासनाच्या सौर कृषी वाहिनी योजनेअंतर्गत शेतकऱ्यांना 365 दिवस वीज पुरवठा करण्याची योजना असून, शेतकऱ्यांना केवळ 10% रक्कम भरून सौर पंप मिळवता येईल. उर्वरित 90% खर्च राज्य शासन उचलेल. पंपाच्या देखभाल आणि दुरुस्तीचा खर्च पुढील पाच वर्षे शासन उचलणार असल्यामुळे शेतकऱ्यांना वीज बिलाची चिंता करावी लागणार नाही.
महत्त्वपूर्ण विकास कामे आणि शासकीय योजना
मुख्यमंत्री माजी लाडकी बहीण योजना, लेक लाडकी योजना यांसारख्या योजनांद्वारे मुलींना उच्च शिक्षणासाठी शंभर टक्के शुल्क सवलत दिली जात असून, राज्य शासन सर्वसामान्यांना न्याय देण्याचा प्रयत्न करत आहे.
अक्कलकोट तालुक्याच्या पाणीटंचाईला इतिहास जमा करण्यासाठी या नव्या प्रकल्पांची भूमिपूजन सोहळा महत्त्वपूर्ण ठरला आहे.
