Latest News : गत पंधरवड्यापासून घमासान सुरू असलेल्या विधानसभा निवडणुकीचा प्रचार सोमवार संपला. शिगेला पोहोचलेल्या प्रचारसभांच्या रॅल्या शहराच्या प्रमुख रस्त्यांवरून मार्गक्रमण करत होत्या, ज्यामुळे शहर प्रचारमय झाले होते. नियोजित वेळेनुसार सायंकाळी ५ वाजताच प्रचार समाप्त झाला आणि प्रचारतोफा थंडावल्या.
दररोज महत्वाच्या घडामोडी आणि MBC Marathi च्या संपर्कात राहण्यासाठी आमचा सोशल मीडिया फॉलो करा.
उमेदवारांनी पारंपरिक प्रचार पद्धतींसोबतच हायटेक साधनांचा उपयोग केला. मतदारांशी थेट संवाद साधण्याबरोबरच, पत्रक वाटणे, सोशल मीडियाचा वापर आणि चित्ररथांची मिरवणूक यांसारख्या उपक्रमांद्वारे मतदारांपर्यंत पोहोचण्याचा प्रयत्न करण्यात आला.
सोमवारपासून मतदारांपर्यंत पोहोचण्यासाठी उमेदवारांच्या निकटवर्तीयांकडून स्लिप वाटपास सुरुवात झाली आहे. झोपडपट्ट्या आणि कुंपणावरच्या मतदारांवर लक्ष केंद्रित करून त्यांना आपल्याकडे वळवण्यासाठी जोरदार प्रयत्न सुरू झाले आहेत. अंतिम टप्प्यातील हा राजकीय डावपेच आता निर्णायक ठरणार आहे.
शहरातील फलक, झेंडे, रिक्षा प्रचार, आणि वाहनांवरील स्पीकर थांबवण्यात आल्याने संध्याकाळपासून शहर शांत झाले आहे. मात्र, प्रचाराच्या पडद्याआड गुप्त डावपेचांना सुरुवात झाली आहे. गुप्त बैठका, राजकीय रणनीती, आणि समर्थकांच्या नियोजनावर भर देण्यात येत आहे.उमेदवारांसाठी हा काळ अत्यंत निर्णायक असून, मतदारांच्या मनावर प्रभाव टाकण्यासाठी शेवटच्या क्षणापर्यंत प्रयत्न केले जात आहेत. आता १९ नोव्हेंबर रोजी होणाऱ्या मतदानावरच सर्वांचे लक्ष केंद्रित झाले आहे.
