नाशिकः: लोकसभा निवडणुकीनंतर देवळाली मतदारसंघात महाविकास आघाडीतील इच्छुकांनी राष्ट्रवादी काँग्रेस (शरदचंद्र पवार) पक्षाकडे उमेदवारीसाठी तयारी दर्शविली असली तरी उद्धवसेनेला जागा सुटणार नाही असे जवळपास स्पष्ट झाले आहे. गेल्या निवडणुकीत ज्या जागा राष्ट्रवादीने जिंकल्या त्या या गटाकडेच राहणार असल्याने घोलप पिता-पुत्रांनी पवित्रा बदलला आहे. त्यामुळे देवळालीच्या जागेवर तुतारीचा उमेदवार असण्याची शक्यता अधिक आहे.
दररोज महत्वाच्या घडामोडी आणि MBC Marathi च्या संपर्कात राहण्यासाठी आमचा सोशल मीडिया फॉलो करा.
गेल्या विधानसभा निवडणुकीत राष्ट्रवादीच्या सरोज अहिरे यांनी माजी आमदार योगेश घोलप यांचा पराभव केला होता. त्यानंतर राष्ट्रवादी काँग्रेस पक्षात फूट पडली आणि अजित पवार गट महायुतीत सामील झाला. यामध्ये देवळाली मतदारसंघाच्या आमदार सरोज अहिरेदेखील सामील झाल्या आहेत. त्यामुळे महाविकास आघाडीतील जागावाटपाचे सत्र बदलले आहे.
पूर्व नाशिकमध्येही राष्ट्रवादी काँग्रेसने निवडणूक लढवली होती. भाजपने उमेदवारी नाकारलेले माजी आमदार बाळासाहेब सानप यांनी निवडणूक लढवली होती. त्यामुळे यंदाही जागा राष्ट्रवादी (शरदचंद्र पवार) पक्षाच लढवणार असल्याचे सूत्रांनी सांगितले. शरद पवार गटाच्या लढवलेल्या जागा आता या गटाकडेच राहणार आहेत, यामुळे यंदा उद्धव ठाकरे गटाला अडचणीत येण्याची शक्यता आहे.
आमदार योगेश घोलप यांनीही यावर्षी जागा सुटलेल्या पक्षाकडे जाण्याची तयारी दर्शवली आहे. त्यामुळे घोलप पिता-पुत्रांनी शरद पवारांची भेट घेण्यास प्रारंभ केला आहे. देवळालीची जागा राष्ट्रवादी काँग्रेस शरद पवार गटाकडेच राहणार असल्याचे जवळपास निश्चित झाले असल्याने योगेश घोलप तुतारीच्या उमेदवार म्हणून उपस्थित होण्याची शक्यता आहे.
