विदर्भ दौऱ्यात शिंदेंचा आत्मविश्वासपूर्ण इशारा
महाराष्ट्राचे उपमुख्यमंत्री आणि शिवसेना प्रमुख एकनाथ शिंदे (Eknath Shinde) यांनी विदर्भ दौऱ्यात विरोधकांवर जोरदार हल्लाबोल केला आहे. नागपूरमधील शिवसेना मेळाव्यात त्यांनी स्पष्ट शब्दांत सांगितले की, “मला हलक्यात घेऊ नका, ज्यांना संकेत समजून घ्यायचा त्यांनी समजून घ्यावा.” त्यांच्या या वक्तव्यामुळे राजकीय वर्तुळात चर्चेला उधाण आले आहे.
दररोज महत्वाच्या घडामोडी आणि MBC Marathi च्या संपर्कात राहण्यासाठी आमचा सोशल मीडिया फॉलो करा.
महायुतीतील नाराजी की विरोधकांसाठी संदेश?
गेल्या काही दिवसांपासून शिंदे (Eknath Shinde) यांच्या महायुतीतील नाराजीबाबत चर्चांना उधाण आले होते. मंत्रिमंडळ बैठकीला गैरहजर राहणे आणि साताऱ्यातील दरेगाव येथे त्यांचा वाढलेला मुक्काम यामुळे अनेक तर्कवितर्क लावले जात होते. मात्र, विदर्भ दौऱ्यात त्यांनी या सर्व चर्चांना पुन्हा नवा रंग दिला आहे.
Eknath Shinde : 2022 ची आठवण करून दिली
एकनाथ शिंदे (Eknath Shinde) यांनी 2022 मध्ये घडलेल्या सत्तांतराचा संदर्भ घेत सांगितले की, “ज्यांनी मला हलक्यात घेतले, त्यांचा मी टांगा पलटी केला. लोकांच्या मनातलं डबल इंजिन सरकार आणलं.” यासोबतच त्यांनी विधानसभा निवडणुकीच्या निकालांवरही भाष्य करत, “आम्ही 200 पेक्षा जास्त जागा जिंकणार, असं सांगितलं होतं, आणि आता 232 जागा निवडून आणल्या आहेत,” असे सांगितले.
महादजी शिंदे पुरस्कारावरून उद्धव ठाकरेंवर हल्लाबोल
महादजी शिंदे पुरस्कार शरद पवार यांच्या हस्ते मिळाल्यानंतर विरोधकांनी त्यावर टीका केली होती. त्यावर उत्तर देताना शिंदे म्हणाले, “एक मराठी माणूस दुसऱ्या मराठी व्यक्तीला पुरस्कार देतो, तरी काही लोक जळतात. ते शेवटी जळून खाक होतील.” त्यांनी अप्रत्यक्षपणे उद्धव ठाकरे आणि संजय राऊत यांच्यावर निशाणा साधला.
“धक्कापुरुष” कोण? उद्धव ठाकरेंवर टीका
शिंदे यांनी उद्धव ठाकरेंना लक्ष्य करत सांगितले की, “काही लोक धक्कापुरुष झाले आहेत, विधानसभा निवडणुकीत लोकांनी त्यांना धक्का देऊन बाहेर बसवलं आहे.” तसेच, “बाळासाहेब ठाकरेंच्या विचारांना धक्का देणाऱ्यांना जनता धक्का दिल्याशिवाय राहणार नाही,” असेही ते म्हणाले.
शिंदेंची शिवसेना म्हणजे ‘बाजारातील मजबूत शेअर’
शिवसेना पक्षाच्या ताकदीबाबत बोलताना शिंदे म्हणाले, “शेअर बाजारात ज्या शेअरची पत असते, ते लोक खरेदी करतात. तशीच आमची शिवसेना आहे.” त्यांनी हे वक्तव्य करून आपल्या पक्षातील वाढत्या संख्येचा दाखला दिला.
