पंधरावा वित्त आयोगाचा महत्त्वाकांक्षी प्रकल्प अंतिम टप्प्यात
Gangapur Dam to Bara Bangla – पंधराव्या वित्त आयोगाअंतर्गत सुरू असलेल्या गंगापूर धरण ते बारा बंगला (Gangapur Dam to Bara Bangla) पाइपलाइन प्रकल्पाच्या कामांना वेग देण्याचे आदेश महापालिका आयुक्त मनीषा खत्री यांनी दिले आहेत. बुधवारी (दि. २) त्यांनी प्रकल्प स्थळी भेट देऊन प्रत्यक्ष पाहणी केली. या दौर्‍यात त्यांनी विविध कामांचे निरीक्षण करून तातडीच्या सूचना दिल्या.
दररोज महत्वाच्या घडामोडी आणि MBC Marathi च्या संपर्कात राहण्यासाठी आमचा सोशल मीडिया फॉलो करा.
बॅक प्रेशर टॅंकची प्रगती आणि धरणातील मृतसाठ्याचा उपसा (Gangapur Dam to Bara Bangla)
अतिरिक्त आयुक्त प्रदीप चौधरी, करिश्मा नायर, शहर अभियंता संजय अग्रवाल आणि इतर अधिकाऱ्यांसह आयुक्तांनी २.० द.ल.लि. क्षमतेच्या बॅक प्रेशर टॅंकची प्रगती तपासली. तसेच, हेडवर्क परिसरातील प्रगतिशील कामांचा आढावा घेत मृतसाठा उपसा करण्याच्या तातडीच्या सूचना दिल्या.
सिंहस्थ कुंभमेळ्यासाठी पाणीपुरवठा सुधारण्यासाठी विशेष योजना
गंगापूर येथील ११.५ द.ल.लि. क्षमतेच्या मलशुद्धीकरण केंद्राची पाहणी करत, कुंभमेळ्यासाठी जलसंपदा विभागाकडून ना हरकत प्रमाणपत्र व परवानगी घेण्याचे निर्देश खत्री यांनी दिले. शंकर पाटील चौक ते बळवंत चौक (शनी चौक) या परिसरात जुन्या पाइपलाइनवर नवीन पाइपलाइन टाकण्याच्या सूचनाही देण्यात आल्या.
शहरातील जलशुद्धीकरण केंद्रांची पाहणी
वाहनतळ, वसंत कानेटकर उद्यान, शिवाजीनगर आणि बारा बंगला जलशुद्धीकरण केंद्रांचीही पाहणी दौऱ्यात करण्यात आली. या प्रकल्पामुळे नाशिककरांना अखंड आणि स्वच्छ पाणीपुरवठा मिळणार आहे, असे महापालिका आयुक्त मनीषा खत्री यांनी सांगितले.
प्रकल्प पूर्णत्वाच्या मार्गावर
गंगापूर धरण ते बारा बंगला पाइपलाइन प्रकल्प लवकरच पूर्ण होईल, ज्यामुळे नाशिककरांना पाणीपुरवठ्याची समस्या दूर होईल. महापालिका प्रशासनाने या महत्त्वाकांक्षी प्रकल्पासाठी कठोर मेहनत घेतली असून, पाण्याची टंचाई कमी करण्यासाठी हा प्रकल्प मोलाचा ठरणार आहे.
