Latest News : भारताने चीन सीमेवर सुरक्षा बळकट करण्यासाठी अमेरिकेबरोबर सुमारे चार अब्ज डॉलर (३२ हजार कोटी रुपये) किमतीचा ३१ प्रीडेटर ड्रोन खरेदीचा करार केला आहे. हा करार मंगळवारी दिल्लीत झाला, ज्यामध्ये संरक्षण क्षेत्रातील वरिष्ठ अधिकारी उपस्थित होते. अमेरिकेतील ‘जनरल अॅटॉमिक्स’ कंपनीकडून भारताला हे ड्रोन पुरविले जाणार आहेत.
दररोज महत्वाच्या घडामोडी आणि MBC Marathi च्या संपर्कात राहण्यासाठी आमचा सोशल मीडिया फॉलो करा.
या कराराची सुरुवात अमेरिकेने ‘परकी लष्करांसाठी शस्त्रविक्री’ या धोरणांतर्गत केली आहे. कॅबिनेटच्या सुरक्षा समितीने (CCS) गेल्या आठवड्यात या कराराला मंजुरी दिली. या अंतर्गत, भारतीय नौदलाला १५ ‘सी गार्डियन’ ड्रोन, तर भारतीय हवाई दल आणि लष्कराला प्रत्येकी ८ ‘स्काय गार्डियन’ ड्रोन मिळणार आहेत. या ड्रोनचा उपयोग सागरी टेहळणी, पाणबुडीविरोधी युद्ध, तसेच दूर अंतरावरील लक्ष्यभेद करण्यासाठी केला जाईल.
‘एमक्यू-९बी प्रीडेटर’ ड्रोनची वैशिष्ट्ये अत्यंत महत्त्वाची आहेत. या ड्रोनला ३५ तासांपेक्षा जास्त हवेत राहण्याची क्षमता असून ते उंचावरून आणि दीर्घ पल्ल्यापर्यंत उडू शकते. त्यात चार हेलफायर क्षेपणास्त्रे तसेच ४५० किलो वजनाचे बॉम्ब वाहून नेण्याची क्षमता आहे. हे ड्रोन चीन सीमेजवळ टेहळणी आणि अन्य सामरिक कार्यांसाठी विशेषतः उपयुक्त ठरतील.
भारताचे हे पाऊल चीनच्या सीमेवरील सुरक्षा अधिक मजबूत करण्याच्या दृष्टीने अत्यंत महत्त्वाचे मानले जात आहे. या खरेदीमुळे भारतीय संरक्षण दलांच्या टेहळणी आणि युद्धक्षमता लक्षणीयपणे वाढणार आहे.
