Lates News : महात्मा फुले नविनीकरणीय ऊर्जा व पायाभूत प्रौद्योगिकी मर्यादित (महाप्रीत) राज्यात परवडणारी घरे, सौरऊर्जा, आणि कृत्रिम बुद्धिमत्ता क्षेत्रातील बदलांमध्ये आघाडीवर राहणार आहे, असा निर्देश मुख्यमंत्री एकनाथ शिंदे यांनी दिला आहे. काल (दि. ११ ऑक्टोबर) महाप्रीतच्या संचालक मंडळाच्या २५ व्या बैठकीत मुख्यमंत्री शिंदे यांनी विविध प्रकल्पांची कामे अधिक जलद आणि दर्जेदार करण्याच्या दृष्टीने महाप्रीतला पुढाकार घेण्याची गरज व्यक्त केली.
दररोज महत्वाच्या घडामोडी आणि MBC Marathi च्या संपर्कात राहण्यासाठी आमचा सोशल मीडिया फॉलो करा.
महाप्रीतद्वारे राज्यातील ठाणे शहरात क्लस्टर प्रकल्प प्रभावीपणे राबवण्यात येत असून, या प्रकल्पामुळे हजारो परवडणारी घरे बांधली जात आहेत, जेणेकरून अनेकांचे हक्काच्या घराचे स्वप्न पूर्ण होईल. सौरऊर्जा क्षेत्रातही महाप्रीतचे काम राज्यात आणि परराज्यात उल्लेखनीय ठरत आहे. मुख्यमंत्री लघु उद्योग सौर छत योजना अंतर्गत राज्यातील १० हजार लघु आणि मध्यम औद्योगिक घटकांना अक्षय ऊर्जा उपलब्ध करून देण्याचे लक्ष्य आहे. या योजनेतून महाराष्ट्रातील लघु आणि मध्यम उद्योगांना मोठा फायदा होणार आहे.
ठाणे क्लस्टर डेव्हलपमेंट प्रकल्पामध्ये किसन नगर आणि इतर भागांमध्ये ५ हजाराहून अधिक पुनर्वसन युनिट्स बांधण्यात येणार आहेत. तसेच, महाराष्ट्र केमिकल लॉजिस्टिक पार्कसाठी आवश्यक पायाभूत सुविधांची निर्मिती करण्यात येणार आहे. या प्रकल्पांसाठी सुमारे १० हजार कोटी रुपयांचा निधी उभारण्याचा निर्णय घेण्यात आला आहे. राज्यातील झोपडपट्टी पुनर्वसन योजना आणि प्रधानमंत्री आवास योजना अंतर्गत विविध प्रकल्पांची माहितीही बैठकीत सादर करण्यात आली.
सौरऊर्जा प्रकल्पांसाठी हिंदुहृदयसम्राट बाळासाहेब ठाकरे समृद्धी महामार्गालगतच्या जागेवर प्रकल्प विकसित करण्यात येणार आहेत. याशिवाय, गोव्यातील ३० मेगावॅट क्षमतेचा सौर प्रकल्प महाप्रीतला देण्यात आला आहे. डिसेंबर २०२३ मध्ये दावोस येथे सौर आणि पवन-सौर संकरित प्रकल्पांच्या प्रगतीचा आढावा घेण्यात येईल, अशीही माहिती बैठकीत देण्यात आली.
मुख्यमंत्री शिंदे यांनी महाप्रीतला जागतिक दर्जाच्या प्रकल्पांमध्ये पुढाकार घेण्याचे आवाहन केले आहे, ज्यामुळे राज्याच्या प्रगतीला अधिक गती मिळेल.
