Nashik accident : नाशिकमध्ये भीषण अपघात : नववधूच्या आईसह दोन मृत, 5 जण जखमी

विवाहासाठी जात असलेल्या वहाऱ्यावर काळाचा घाला, आडगावजवळ जीपचा ट्रकला भीषण धडक

Nashik accident – नालासोपाऱ्याहून भुसावळकडे मुलीच्या लग्नासाठी निघालेल्या कुटुंबाच्या आनंदावर अपघाताचा काळा पडदा पसरला. सोमवारी (दि. ७) पहाटे मुंबई-आग्रा महामार्गावर आडगावजवळ जीप आणि ट्रकचा भीषण अपघात (Nashik accident) होऊन नववधूची आई ममतादेवी प्रेमकुमार मोदनवाल (५४) व जीपचालक समाधान संतोष सोनवणे (३७) यांचा मृत्यू झाला. या अपघातात पाच प्रवासी जखमी झाले आहेत.

ट्रकच्या मागे सुसाट जीप आदळली; चालकाला आली डुलकी (Nashik accident)

द्वारका ओलांडल्यानंतर आडगावजवळ भीषण धडक

नालासोपाऱ्याहून भुसावळकडे लग्नासाठी निघालेले मोदनवाल कुटुंब एमएच-४८ डीसी-२४६१ या जीपने प्रवास करत होते. पहाटे नाशिक शहरातून द्वारका ओलांडून आडगावच्या दिशेने जाताना टी-पॉइंटजवळ त्यांच्या जीपने एमएच-११ एएल-७८७९ या ट्रकला जोरदार पाठीमागून धडक दिली. जीपचा वेग प्रचंड असल्यामुळे आणि चालकाला डुलकी आल्याने अपघात झाला, अशी माहिती पोलिसांनी दिली.

ममतादेवी यांचा जागीच मृत्यू; चालकाचाही उपचारादरम्यान मृत्यू

शासकीय रुग्णालयात उपचार सुरू असतानाच दोघांनी घेतला अखेरचा श्वास

१०८ रुग्णवाहिकेच्या सहाय्याने जखमींना तातडीने जिल्हा रुग्णालयात हलवण्यात आले. मात्र ममतादेवी यांना डॉक्टरांनी तपासल्यानंतर मृत घोषित केले. चालक समाधान सोनवणे याचाही उपचारादरम्यान मृत्यू झाला.

अपघातात हे प्रवासी जखमी

एकाच कुटुंबातील पाच जणांना दुखापत

जखमी प्रवाशांची नावे खालीलप्रमाणे:

• श्रेया प्रेमकुमार मोदनवाल (१४)
• अभिनंदन अशोक मोदनवाल (१०)
• अंश अशोक मोदनवाल (१३)
• वरुण अशोक मोदनवाल (१६)
• पिंकी अशोक मोदनवाल (४०)

पाचही जणांचे डोके, पाय आणि हातांवर गंभीर मार लागला असून त्यांच्यावर उपचार सुरू आहेत. सुदैवाने सर्वांची प्रकृती सध्या स्थिर असल्याचे सूत्रांनी सांगितले.

गतिरोधक कारणीभूत की चालकाची चूक?

परिसरात अपघाताची जोरदार चर्चा

या भागात महामार्गावर तीन ठिकाणी गतिरोधक असल्याने ट्रकचालकाने वेग कमी केला होता. यावेळी जीपचालक डुलकी लागल्याने त्याला ट्रक लक्षात आला नाही आणि भीषण धडक झाली. काही नागरिकांनी गतिरोधकांमुळे अपघात झाल्याचा आरोप केला आहे, तर काहींच्या मते चालकाने वेळीच सावधगिरी बाळगली असती तर अपघात टाळता आला असता.

पोलिसांची कारवाई सुरू

या अपघाताची नोंद आडगाव पोलिस ठाण्यात आकस्मिक मृत्यू म्हणून झाली असून, गुन्हा दाखल करण्याचे काम सुरू आहे. पोलिसांकडून अपघाताचे कारण, चालकाची जबाबदारी आणि ट्रकच्या गतीमान स्थितीचा तपास सुरु आहे.