पावसामुळे झालेल्या नुकसानीचे पंचनामे करून तातडीने प्रस्ताव सादर करा – मंत्री छगन भुजबळ
दररोज महत्वाच्या घडामोडी आणि MBC Marathi च्या संपर्कात राहण्यासाठी आमचा सोशल मीडिया फॉलो करा.
येवला (जि. नाशिक): पेरणीचा हंगाम तोंडावर असताना शेतकऱ्यांना कोणत्याही अडचणीशिवाय खते आणि बियाणे मुबलक प्रमाणात उपलब्ध व्हावीत, यासाठी अन्न व नागरी पुरवठा मंत्री छगन भुजबळ यांनी अधिकाऱ्यांना काटेकोर नियोजनाचे आदेश दिले. तसेच पावसामुळे झालेल्या शेतीच्या नुकसानीचे तातडीने पंचनामे करून शासनास प्रस्ताव सादर करावेत, असेही स्पष्ट निर्देश त्यांनी दिले.
शेतकरी केंद्रस्थानी – मदतीपासून कोणीही वंचित राहू नये
Nashik Agriculture News – मंत्री छगन भुजबळ यांनी रविवारी (दि.15) येवला येथील संपर्क कार्यालयात घेतलेल्या आढावा बैठकीत विविध विकासकामे आणि पावसामुळे झालेल्या नुकसानीबाबत माहिती घेतली.
उपस्थित अधिकारी:
- प्रांताधिकारी बाबासाहेब गाढवे
- तालुका कृषी अधिकारी शुभम बेरड
- नायब तहसीलदार पंकज नेवसे
- राष्ट्रवादी काँग्रेसचे वसंत पवार
- अल्पसंख्याक आयोग सदस्य हुसेन शेख
भुजबळ यांचे महत्त्वाचे निर्देश:
- शेतकऱ्यांना त्वरित मदत मिळावी यासाठी पंचनामे पूर्ण करा
- वीज पडणे, अतिवृष्टी, जीवित आणि वित्तहानीच्या प्रकरणांची मदत तत्काळ द्या
- टंचाईग्रस्त भागांत नियमित पाणीपुरवठा सुरू ठेवा
- १ जुलैनंतरही टँकरची गरज भासल्यास तातडीने प्रस्ताव पाठवा
- तालुक्यात वाटपासाठी २५० क्विंटल बियाणे शासनाकडून मंजूर – लाभार्थ्यांपर्यंत वितरण योग्य पद्धतीने करा
- खतांचा साठा पुरेसा आणि वेळेवर उपलब्ध असला पाहिजे
कालवा प्रकल्पाची प्रगती – पुणेगाव-डोंगरगाव कालव्याचे अस्तरीकरण सुरू
पुणेगाव- दरसवाडी- डोंगरगाव कालवा प्रकल्पाचा टप्पा १ आणि टप्पा २ अंतर्गत अस्तरीकरणाचे काम सुरू असून, मंत्री भुजबळ यांनी याचीही माहिती घेतली. त्यांनी संबंधित अधिकाऱ्यांना कामाच्या ठिकाणी पोलीस बंदोबस्त ठेवण्याच्या सूचना दिल्या. अधिकारी वर्गाने ३० जूनपर्यंत काम पूर्ण करण्याची ग्वाही दिली.
