Nashik : सिंहस्थ कुंभमेळ्यासाठी (Kumbhmela) नाशिक महानगरपालिकेने तयारीचे मोठे पाऊल उचलले आहे. मुंबई येथे मुख्य सचिवांच्या अध्यक्षतेखाली झालेल्या बैठकीत कुंभच्या ऐतिहासिक महोत्सवासाठी बहुआयामी योजना सादर करण्यात आल्या. विभागीय आयुक्त डॉ. प्रविण गेडाम यांच्या सविस्तर सादरीकरणातून कुंभच्या संपूर्ण व्यवस्थापनाचा एक नवा आराखडा पुढे आला.
दररोज महत्वाच्या घडामोडी आणि MBC Marathi च्या संपर्कात राहण्यासाठी आमचा सोशल मीडिया फॉलो करा.
महाकुंभाच्या पार्श्वभूमीवर गोदावरी नदीच्या स्वच्छतेसाठी ९ मलनिःसारण केंद्रांचे अद्ययावतकरण आणि नवीन केंद्रांची उभारणी करण्यात येणार आहे. या उपक्रमासाठी राज्य शासन व केंद्र शासन संयुक्तरीत्या निधीची व्यवस्था करणार आहेत. नदीचे प्रदूषण रोखण्यासाठी शहरी व ग्रामीण भागात प्रभावी उपाययोजना राबवल्या जाणार आहेत.
गोदावरीचा सौंदर्यीकरण व पर्यावरणपूरक विकास करण्यासाठी तज्ज्ञ सल्लागार एजन्सीची नियुक्ती केली जाणार आहे. नदीकाठचा रिव्हर फ्रंट आकर्षक बनवून भाविकांना एक अद्वितीय अनुभव देण्याचा मनपा प्रशासनाचा मानस आहे.
केंद्र शासनाकडून मंजूर झालेल्या रामकालपथ प्रकल्पाचे काम तातडीने सुरू होणार आहे. या प्रकल्पासाठी मार्च २०२६ च्या आत निधीचा संपूर्ण उपयोग करून भाविकांसाठी आधुनिक आणि सुविधा-संपन्न पायाभूत सुविधा उभारल्या जातील.
नाशिकला वाहतूक व्यवस्थेत एक आदर्श केंद्र बनवण्यासाठी मल्टी-मोडल ट्रान्सपोर्ट हबचा प्रस्ताव सादर करण्यात आला आहे. मेट्रो, रेल्वे, बस, आणि रस्ते वाहतूक यंत्रणांची एकत्रित योजना आखून, नागरिक व भाविकांसाठी अत्याधुनिक वाहतूक सुविधा उभारल्या जातील.
प्रयागराज कुंभमेळ्याच्या व्यवस्थापनाचा अभ्यास करण्यासाठी नाशिक महानगरातील अधिकाऱ्यांचे पथक प्रयागराजला पाठवले जाणार आहे. तेथील यशस्वी व्यवस्थापनाचा अनुभव नाशिकमध्ये लागू करण्यात येणार आहे.
नाशिक महानगरपालिका, विभागीय आयुक्त आणि राज्य शासनाच्या समन्वयातून सिंहस्थ कुंभमेळ्यासाठी नाशिकचे रूपांतर एका जागतिक दर्जाच्या धार्मिक, सांस्कृतिक आणि पर्यटन केंद्रात होणार आहे.
