नाशिक |Nashik News: अंबड आणि सिडको परिसरात सलग तीन दिवसांत एक शालेय आणि दोन महाविद्यालयीन विद्यार्थ्यांनी आत्महत्या केल्याने शहरात खळबळ उडाली आहे. मोबाइलचा अतिवापर, अभ्यासाचा ताण, कौटुंबिक व सामाजिक दबाव, प्रेमभंग आणि नैराश्य ही यामागची प्रमुख कारणे असल्याची चर्चा आहे.
तरुणाई निराशेच्या गर्तेत
नाशिकच्या अंबड आणि सिडको भागात घडलेल्या या तीन घटनांनी विद्यार्थ्यांच्या मानसिक आरोग्याबद्दल गंभीर प्रश्न निर्माण केले आहेत. मानसिक ताणतणाव, नापास होण्याची भीती, पालकांचा राग, व्यसनाधीनता, आणि वाईट संगत यामुळे अल्पवयीन मुलं आणि तरुणाई आत्महत्येसारखे टोकाचे पाऊल उचलत आहेत. यामध्ये मुलींचे प्रमाण अधिक असल्याचे समोर आले आहे.
मोबाइल आणि ऑनलाइन शिक्षणाचा परिणाम
ऑनलाइन शिक्षणामुळे विद्यार्थ्यांच्या हातात आलेल्या अँड्रॉइड मोबाइलचा काहींनी चांगला उपयोग केला, तर काही जण मोबाइलच्या अतिवापरामुळे व्यसनाधीन झाले. रागीटपणा, एकटेपणा आणि नैराश्यामुळे कमी वयातच अनेकजण जीवन संपवण्याच्या मार्गावर चालत आहेत.
घडलेल्या घटना
- अंबड औद्योगिक वसाहत – रमाबाई आंबेडकर परिसर:
- युवराज मगरे (वय १३), नववीचा विद्यार्थी
- घरात गळफास घेऊन आत्महत्या
- सिडको – विजयनगर:
- मनीषा गवांदे (वय १९), बी.कॉम. अंतिम वर्षाची विद्यार्थिनी
- १२ ऑगस्ट सकाळी १० वाजता गळफास
- सह्याद्रीनगर:
- ऋतिका नितीन इंगळे, महाविद्यालयीन तरुणी
- १२ ऑगस्ट रात्री १०:३० वाजता ओढणीने गळफास
मानसिक आरोग्याकडे दुर्लक्ष धोकादायक (Nashik News)
तज्ज्ञांच्या मते, मुलं तणावात असताना पालकांनी समाजाच्या भीतीपोटी त्यांना मानसोपचार तज्ज्ञांकडे न नेणे ही मोठी चूक आहे. मुलांच्या आवडीनिवडी लक्षात घेऊन शिक्षण, तणाव व्यवस्थापन आणि भावनिक आधार देणे गरजेचे आहे. विशेषतः मुली भावनिकदृष्ट्या संवेदनशील असल्याने नैराश्याचा धोका अधिक असतो.
