हरसूल पोलिसांचा अचूक तपास • २४ तासांत आरोपी गजाआड• प्रेमातील विकृतीचे उघडपणे दर्शन
त्र्यंबकेश्वर (नाशिक): One-Sided Love Murder
नाशिक जिल्ह्यातील त्र्यंबक तालुक्यात एकतर्फी प्रेमातून घडलेला अमानुष खून समोर आला आहे. खरवळ पैकी वीरनगर शिवारात एका महिलेचा खून केल्याची थरारक घटना गुरुवारी घडली. हरसूल पोलिसांनी अवघ्या २४ तासांत तपास उलगडून संशयिताला अटक केली असून, या घटनेमुळे परिसरात खळबळ उडाली आहे.
काय घडलं नेमकं?
गुरुवारी (२६ जून) सायंकाळी साडेसातच्या सुमारास वैशाली नामदेव चव्हाण (वय ४०, रा. वीरगाव) ही महिला रस्त्याच्या कडेला गंभीर जखमी अवस्थेत आढळून आली. तिला तत्काळ हरसूल ग्रामीण रुग्णालयात नेण्यात आले, मात्र डॉक्टरांनी तपासून मृत घोषित केले.
सुरुवातीला मृत महिलेच्या पतीने अपघाती मृत्यूचा अंदाज व्यक्त केला होता. मात्र शवविच्छेदन अहवालात ती हत्या असल्याचे स्पष्ट झाले.
तपासाचा वेग आणि पोलिसांची दक्षता (One-Sided Love Murder)
घटना घडलेल्या शिवार परिसरात कोणतेही ठोस पुरावे नव्हते, तरीही हरसूल पोलिसांनी वर्णनावरून आरोपीचा माग काढला.
पोलिस अधीक्षक बाळासाहेब पाटील, अप्पर पोलिस अधीक्षक आदित्य मिरखेलकर, व उपविभागीय पोलिस अधिकारी वासुदेव देसले यांच्या मार्गदर्शनाखाली तीन स्वतंत्र तपास पथके तयार करण्यात आली.
भगवान पांडुरंग शिंदे (वय ३४, रा. पिंपळपाडा, ता. मोखाडा, जि. पालघर) हा संशयित आरोपी घटनेच्या दिवशी घटनास्थळी दिसल्याचे पोलिसांच्या निदर्शनास आले. त्याला आडगाव शिवारातून ताब्यात घेऊन चौकशी केली असता, त्याने गुन्ह्याची कबुली दिली.
एकतर्फी प्रेमातून विकृती : खारट नकाराचा क्रूर शेवट
पोलिस तपासानुसार, संशयित शिंदे हा मृत महिला वैशालीवर एकतर्फी प्रेम करत होता. मात्र तिच्याकडून नकार व अपमान सहन न झाल्याने, रागाच्या भरात लाकडी दांड्याने डोक्यावर वार करून तिचा खून केला.
पोलीस पथकाचे यशस्वी कामगिरी
या गुन्ह्याचा तपास सहायक निरीक्षक चेतन लोखंडे, उपनिरीक्षक मोहित मोरे, तसेच अंमलदार युवराज चव्हाण, रविकिरण पवार, विलास जाधव, हेमंत पवार, मोरेश्वर पिठे यांच्या पथकाने पूर्ण केला. हरसूल पोलिस ठाण्याचे पथक सध्या पुढील तपास करत आहे.
