उदय कॉलनी अतिक्रमण प्रकरणावरून आंदोलनकर्त्यांचा तीव्र निषेध
“मनपा सर्वसामान्यांची का फक्त कर वसुलीसाठी?” — ॲड. सुरेश आव्हाड
Uday Colony encroachment issue: राष्ट्रवादी काँग्रेस पार्टीच्या वतीने ॲड. सुरेश आव्हाड यांच्या नेतृत्वाखाली नाशिक महानगरपालिकेच्या दालनात ठिय्या आंदोलन करण्यात आले. उदय कॉलनी येथील अतिक्रमण कारवाईवर आरोग्याच्या कारणास्तव थोडा वेळ मिळावा, या मागणीसाठी नागरिकांनी मनपा आयुक्त मनीषा खत्री यांची भेट घेण्याचा प्रयत्न केला. मात्र आयुक्तांनी आंदोलनकर्त्यांना भेट देण्यास टाळाटाळ केल्याने नागरिकांनी थेट आयुक्तांच्या दालनात ठिय्या मारून निषेध व्यक्त केला.
दररोज महत्वाच्या घडामोडी आणि MBC Marathi च्या संपर्कात राहण्यासाठी आमचा सोशल मीडिया फॉलो करा.
अतिक्रमण कारवाईवर प्रश्नचिन्ह (Uday Colony encroachment issue)
या आंदोलनात आंदोलनकर्त्यांनी असा आरोप केला की अतिक्रमण निर्मूलनाची कारवाई कायदेशीर प्रक्रियेशिवाय फक्त वरिष्ठांच्या दबावाखाली केली जात आहे. त्यामुळे संबंधित नागरिकांना अन्यायकारक त्रास सहन करावा लागत आहे. एका घरमालक महिलेला कारवाईदरम्यान आरोग्याच्या समस्या उद्भवल्याने वैद्यकीय मदतीसाठी आणि कारवाईला थोडा वेळ मिळावा यासाठी निवेदन सादर करण्यात आले.
“आयुक्तांना नागरिकांसाठी वेळ नाही!” (Uday Colony encroachment issue)
या आंदोलनात बोलताना ॲड. सुरेश आव्हाड म्हणाले, “महानगरपालिका नागरिकांसाठी आहे की फक्त कर वसुलीसाठी? आयुक्त फक्त आठवड्यातून दोन दिवसच नागरिकांना भेटतात, त्यामुळे सामान्य जनतेला मोठा त्रास होतो.” त्यांनी आयुक्त मनीषा खत्री यांच्यावर सामान्यांच्या समस्यांकडे दुर्लक्ष केल्याचा आरोप करत निषेध नोंदवला.
आंदोलनात सहभागी नेते आणि कार्यकर्ते
या ठिय्या आंदोलनात ॲड. सुरेश आव्हाड यांच्यासह देविदास गीते, प्रियांका थोरात, लक्ष्मी तागड, विनीत अहिरे आदी कार्यकर्ते उपस्थित होते. सर्वांनी एकमताने अतिक्रमण कारवाईला थांबवण्याची मागणी केली.
