देवळा | Nashik Crime Update : Nashik News देवळा तालुक्यातील खुंटेवाडी येथे चकित करणारी घटना घडली आहे. युवा शेतकरी प्रकाश दामू पगार यांच्या डाळिंब बागेतून अज्ञात चोरट्यांनी बुधवारी (दि. १३) रात्री लाखोंचा डाळिंब माल चोरून नेला. घटनेनंतर परिसरातील शेतकऱ्यांमध्ये संताप व भीतीचे वातावरण आहे.
दोन ते अडीच लाखांचे नुकसान
प्रकाश पगार यांनी दीड एकर क्षेत्रात ४८० झाडांची डाळिंब लागवड केली आहे. यावर्षी झाडांना उत्तम मृगबहर आल्याने फळे तोडणीस तयार होती. मात्र, रात्रीच्या सुमारास अज्ञात चोरट्यांनी झाडांवरील डाळिंब काढून नेले. या चोरीत सुमारे ₹ 2 ते 2.5 लाख रुपयांचे नुकसान झाले आहे.
बिबट्यांचा वावर – चोरट्यांचा फायदा
सध्या या भागात बिबट्यांचा वावर वाढल्याने शेतकरी रात्री एकटे राखण करण्यास घाबरत आहेत. याचा फायदा घेत चोरटे शेतातील डाळिंब, कांदा आणि इतर मौल्यवान शेतमालावर डोळा ठेवत आहेत.
शेतकऱ्यांच्या सुरक्षेच्या उपाययोजना
- काही शेतकरी लोखंडी व लाकडी माळांवरून रात्री राखण करत आहेत.
- बॅटरीचा झोत मारत व “जागते रहो” इशारे देत सतर्कता ठेवली जाते.
- अनेकांनी शेतात सीसीटीव्ही कॅमेरे बसवले आहेत.
सध्या बाजारात डाळिंबाला ₹ 130 ते ₹ 200 प्रति किलो असा चांगला भाव मिळत असल्याने चोरीच्या घटनांत वाढ होत असल्याचे शेतकऱ्यांचे म्हणणे आहे.
शेतकऱ्यांची मागणी (Nashik News)
घटनेनंतर देवळा पोलिसांत तक्रार दाखल करण्यात आली आहे. शेतकऱ्यांनी पोलिसांनी अशा चोरट्यांवर तातडीने कारवाई करून ग्रामीण भागात गस्त वाढवावी, अशी मागणी केली आहे.
