येवला, : माजी मंत्री आणि राष्ट्रवादी काँग्रेस (अजित पवार गट) नेते छगन भुजबळ (Chhagan Bhujbal) यांना एका नव्या राजकीय परीक्षेला सामोरे जावे लागणार आहे. विधानसभा निवडणुकीत त्यांची झालेली निवड आता आव्हानाच्या भोवऱ्यात सापडली आहे.
दररोज महत्वाच्या घडामोडी आणि MBC Marathi च्या संपर्कात राहण्यासाठी आमचा सोशल मीडिया फॉलो करा.
नुकत्याच पार पडलेल्या महाराष्ट्र विधानसभा निवडणुकीत येवला मतदारसंघातून छगन भुजबळ (Chhagan Bhujbal) यांनी १,३५,०२३ मते मिळवून विजय मिळवला होता. मात्र, त्यांच्या प्रतिस्पर्धी आणि राष्ट्रवादी काँग्रेस (शरद पवार गट) चे उमेदवार ॲड. माणिकराव शिंदे यांनी निकालावर आक्षेप घेत निवडणूक निर्णय अधिकाऱ्यांकडे तक्रार दाखल केली. त्यांच्या आरोपानुसार, ईव्हीएममध्ये गडबड झाल्याने निकालावर परिणाम झाला आहे.
निवडणूक निर्णय अधिकाऱ्यांनी याबाबत निर्णय देत २४ फेब्रुवारी रोजी येवला मतदारसंघातील एका मतदान केंद्रावर मॉकपोल घेण्याचा आदेश दिला आहे. यामुळे येवल्यात राजकीय वातावरण पुन्हा तापले आहे.
महाराष्ट्रातील २७ पराभूत उमेदवारांनी ईव्हीएम संदर्भात शंका उपस्थित करत निवडणूक आयोगाकडे तक्रारी केल्या आहेत. त्यामुळे राज्यभरात विविध मतदारसंघांमध्ये अशाच प्रकारच्या चाचण्या होण्याची शक्यता आहे.
विधानसभा निवडणुकीत विजय मिळवल्यानंतरही छगन भुजबळ (Chhagan Bhujbal) यांना अजित पवार यांच्या मंत्रिमंडळात स्थान मिळालेले नाही. यामुळे भुजबळ समर्थक नाराज आहेत. त्यांच्या आणि पक्ष नेतृत्वाच्या मतभेदांमुळे त्यांना मंत्रिपद मिळाले नसल्याची चर्चा आहे.
या मॉकपोलच्या निकालावर अनेकांच्या नजरा लागल्या आहेत. जर भुजबळ यांच्या विजयावर प्रश्नचिन्ह निर्माण झाले, तर महाराष्ट्राच्या राजकारणात मोठी उलथापालथ होऊ शकते.
