कोल्हापूर, महाराष्ट्र: राज्यातील ६५ वर्षे वय आणि त्यावरील ज्येष्ठ नागरिकांना वयोमानानुसार येणारे दिव्यांगत्व, अशक्तपणा यावर उपाययोजना करण्यासाठी, मुख्यमंत्री एकनाथ शिंदे यांनी गारगोटी, कोल्हापूर येथे “मुख्यमंत्री वयोश्री योजना” सुरू केली. या योजनेचा उद्देश ज्येष्ठ नागरिकांचे मानसिक स्वास्थ्य अबाधित ठेवणे आणि आवश्यक सहाय्य उपकरणे प्रदान करणे आहे.
दररोज महत्वाच्या घडामोडी आणि MBC Marathi च्या संपर्कात राहण्यासाठी आमचा सोशल मीडिया फॉलो करा.
योजनेचे स्वरूप आणि लाभ
या योजनेअंतर्गत पात्र लाभार्थ्यांना एक वेळ एक रकमी ३०००/- रुपयांचे अनुदान देण्यात येणार आहे. महाराष्ट्रात आजपर्यंत १७ लाख २३ हजार ३० अर्ज प्राप्त झाले आहेत, त्यापैकी कोल्हापूर जिल्ह्यातील ४०,२२ ० लाभार्थ्यांच्या खात्यावर डीबीटीद्वारे निधी वर्ग करण्यात येणार आहे. यामुळे ज्येष्ठ नागरिकांना आवश्यक असलेली सहाय्य उपकरणे खरेदी करण्यास मदत होईल.
मुख्यमंत्री शिंदे यांनी आवाहन केले की, ज्येष्ठ नागरिकांनी मनस्वास्थ्य केंद्रे आणि योगउपचार केंद्रे इत्यादीद्वारे शिबिरामध्ये सहभागी व्हावे. यामुळे त्यांचे शारीरिक व मानसिक स्वास्थ्य मजबूत होईल.
कार्यक्रमात उपस्थित
या कार्यक्रमात आमदार प्रकाश अबीटकर, जिल्हाधिकारी अमोल येडगे, पोलीस अधीक्षक महेंद्र पंडित, उपविभागीय अधिकारी हरेश सूळ, तसेच सहाय्यक आयुक्त, समाज कल्याण सचिन साळे उपस्थित होते. त्यांनी या योजनेच्या महत्त्वावर चर्चा केली आणि यशस्वी अंमलबजावणीसाठी एकत्रितपणे काम करण्याचे आश्वासन दिले.
राज्यभर अंमलबजावणी
कोल्हापूरमधून सुरू झालेल्या मुख्यमंत्री वयोश्री योजनेची अंमलबजावणी आता राज्यभरातील सर्व जिल्ह्यात सुरू होत आहे. यामुळे महाराष्ट्रातील ज्येष्ठ नागरिकांच्या जीवनात सकारात्मक बदल घडवून आणण्याची आशा आहे.
