Deputy Tehsildars Promotion | नाशिक विभागातील 21 मंडळ अधिकारी नायब तहसीलदारपदी पदोन्नत

महसूल दिनाच्या पूर्वसंध्येला मोठा निर्णय; महसूल व वन विभागाची कार्यवाही

नाशिक Deputy Tehsildars Promotion: महसूल दिनाच्या पूर्वसंध्येला महसूल व वन विभागातर्फे एक महत्त्वपूर्ण निर्णय घेण्यात आला आहे. नाशिक आणि छत्रपती संभाजीनगर विभागातील एकूण ६२ अधिकाऱ्यांना ‘नायब तहसीलदार’ (राजपत्रित, गट-ब) पदावर पदोन्नती जाहीर करण्यात आली आहे. विशेष म्हणजे, नाशिक विभागातील २१ मंडळ अधिकारी यांना या निर्णयाअंतर्गत नियमित पदोन्नती मिळाली आहे.

प्रशासकीय कार्यक्षमता वाढणार – महसूलमंत्री बावनकुळे

ही पदोन्नती महसूलमंत्री चंद्रशेखर बावनकुळे यांच्या आदेशानुसार आणि 2024-25 निवडसूची वर्षासाठी सामान्य प्रशासन विभागाच्या सहमतीने पूर्ण करण्यात आली. खुल्या प्रवर्गातील रिक्त पदांवर या अधिकाऱ्यांची नियुक्ती करण्यात आली असून, त्यामुळे प्रशासकीय यंत्रणा अधिक सक्षम होणार आहे.

छत्रपती संभाजीनगर विभागात ४१ अधिकाऱ्यांना पदोन्नती

छत्रपती संभाजीनगर विभागात सहायक महसूल अधिकारी आणि मंडळ अधिकारी संवर्गातील ४१ कर्मचाऱ्यांना पदोन्नती देण्यात आली आहे. यामध्ये काहींना नियमित पदोन्नती कोट्यातील रिक्त पदांवर, तर काहींना सरळसेवा कोट्यातील पदांवर बढती देण्यात आली आहे.

महसूल विभागात उत्साहाचे वातावरण

पदोन्नतीबाबत बोलताना महसूलमंत्री बावनकुळे म्हणाले, “महसूल दिनाच्या निमित्ताने दिलेली ही पदोन्नती अधिकाऱ्यांना नवीन जबाबदाऱ्या पार पाडण्यासाठी प्रेरणा देईल आणि जनतेच्या सेवेत त्यांचे योगदान अधिक प्रभावी ठरेल.” नवपदोन्नत अधिकाऱ्यांना त्यांनी शुभेच्छाही दिल्या.

या निर्णयामुळे महसूल विभागातील मनुष्यबळाची कमतरता भरून निघणार असून, प्रशासकीय कार्यक्षमता आणि सेवा वितरणात लक्षणीय सुधारणा होणार आहे. त्यामुळे महसूल विभागात उत्साहाचे आणि सकारात्मक वातावरण निर्माण झाले आहे.