कर्दे गावाला कृषी पर्यटन श्रेणीत उत्कृष्ट पुरस्कार

मुंबई, दि. २८: महाराष्ट्रातील रत्नागिरी जिल्ह्यातील कर्दे गावाला कृषी पर्यटन श्रेणीत “सर्वोत्कृष्ट पर्यटन गाव” पुरस्कार २०२४ प्रदान करण्यात आला आहे. भारत सरकारच्या पर्यटन मंत्रालयाने जागतिक पर्यटन दिनानिमित्त या प्रतिष्ठित पुरस्काराची घोषणा केली. या विशेष सोहळ्यात पर्यटन संचालनालयाचे सह संचालक स्वप्निल कापडणीस, सरपंच सचिन तोडणकर, उपसरपंच दत्ताराम भुवड, कृषी अधिकारी सुनील खरात यांच्यासह कर्दे गावातील अन्य सदस्यांनी दिल्ली येथे हा पुरस्कार स्वीकारला.

या स्पर्धेत भारतातील ३० राज्ये आणि केंद्रशासित प्रदेशांतील ९९१ गावांनी भाग घेतला होता. एकूण आठ वेगवेगळ्या श्रेणींमध्ये ३६ गावांची निवड करण्यात आली, ज्यात महाराष्ट्रातील १२६ ग्रामपंचायतींनी सहभाग घेतला. कर्दे गावाला स्थानिक अर्थव्यवस्थेत महत्त्वपूर्ण योगदान देणाऱ्या कृषी पर्यटनाला चालना देण्याच्या प्रयत्नांसाठी या पुरस्काराने मान्यता मिळाली आहे.

रत्नागिरीच्या किनारपट्टीवर वसलेल्या कर्दे गावात स्वच्छ समुद्रकिनारे, पांढरी वाळू आणि नयनरम्य परिसर यामुळे पर्यटकांना आकर्षित केले आहे. हा पुरस्कार महाराष्ट्रासाठी अभिमानाची बाब असून, यामुळे राज्याच्या पर्यटन विकासाला विशेष चालना मिळेल, अशी अपेक्षा व्यक्त करण्यात आली आहे. संपूर्ण भारतातील या स्पर्धेचा उद्देश ग्रामीण पर्यटनाला चालना देणे, तसेच त्या भागातील पर्यटन विकासात महत्त्वपूर्ण योगदान देणाऱ्या गावांच्या प्रयत्नांना मान्यता देणे हा आहे. कर्दे गावाची निवड कृषी पर्यटन, महिला सक्षमीकरण आणि शाश्वत विकासासाठीच्या नाविन्यपूर्ण दृष्टीकोनांसाठी करण्यात आली आहे. गावाने पर्यावरणीय पर्यटनाला चालना देण्यासाठी नैसर्गिक संसाधनांचा वापर, जल व्यवस्थापन आणि कचरा व्यवस्थापन यासह विविध उपक्रम राबवले आहेत.कर्दे गावाचे यश स्थानिक पर्यावरण आणि संस्कृती जतन करण्याच्या वचनबद्धतेची मान्यता देणारे आहे.

या पुरस्कारामुळे गावाच्या शाश्वत पर्यटनासाठीच्या प्रयत्नांचे महत्त्व वाढले आहे, आणि यामुळे इतर गावांना प्रेरणा मिळेल, असे मत पर्यटन मंत्री गिरीश महाजन, पर्यटन सचिव जयश्री भोज, पर्यटन संचालक डॉ. बी. एन. पाटील यांनी व्यक्त केले आहे.या पुरस्काराने कर्दे गावाच्या ग्रामीण विकासाला नवे वारे मिळेल आणि स्थानिक पर्यावरण संरक्षण आणि विकासास नवा गती मिळेल, अशी आशा व्यक्त करण्यात आली आहे.