नाशिक, 7 जानेवारी 2024: आगामी सिंहस्थ कुंभ महापर्वाच्या यशस्वी आयोजनासाठी नाशिक महानगरपालिकेच्या आयुक्त मनिषा खत्री Manisha Khatri यांनी आज पंचवटी आणि तपोवन परिसरासह महत्त्वाच्या ठिकाणांचा पाहणी दौरा केला. लाखो भाविकांच्या स्वागतासाठी तयार होणाऱ्या या महापर्वासाठी स्वच्छता, सुरक्षितता आणि सुविधांच्या उभारणीसाठी अधिकाऱ्यांना वेळेत कामे पूर्ण करण्याचे स्पष्ट निर्देश देण्यात आले.
दररोज महत्वाच्या घडामोडी आणि MBC Marathi च्या संपर्कात राहण्यासाठी आमचा सोशल मीडिया फॉलो करा.
दौऱ्यादरम्यान, तपोवन परिसर, साधुग्राम, कुंभमेळा प्रशासकीय इमारत, तसेच सिटी लिंक बस डेपो आणि बेघर निवारा केंद्राची पाहणी करण्यात आली. नियोजित साधू ग्रामाच्या ठिकाणी अतिक्रमण हटवणे, स्वच्छता मोहीम गतिमान करणे, तसेच आवश्यक सुविधांची उभारणी यावर आयुक्तांनी विशेष भर दिला.
आयुक्तांनी सांगितले की, “सिंहस्थ महापर्वाच्या आयोजनासाठी सर्व विभागांनी समन्वयाने काम करणे अत्यावश्यक आहे. भाविकांना कोणत्याही अडचणींना सामोरे जावे लागू नये, यासाठी दर्जेदार सुविधा उपलब्ध करून देणे हे महापालिकेचे मुख्य उद्दिष्ट आहे.”
यावेळी रामकुंड परिसरात स्मार्ट सिटी अंतर्गत सुरू असलेल्या विविध प्रकल्पांचे काम जलदगतीने पूर्ण करण्यासाठी संबंधित अधिकाऱ्यांना आदेश दिले गेले. भाविकांच्या सोयीसाठी विशेष आराखड्याची अंमलबजावणी करण्यावर भर देण्यात येत आहे.
दौऱ्यात रामवाडी येथील गोदा वॉक उद्यानाची पाहणी करताना, भाविकांसाठी पर्यावरणपूरक आणि आकर्षक जागा निर्माण करण्याचे महापालिकेचे प्रयत्न अधोरेखित झाले.
या भेटीत आयुक्त मनिषा खत्री Manisha Khatri यांच्यासोबत अतिरिक्त आयुक्त प्रदीप चौधरी, शहर अभियंता संजय अग्रवाल, स्मार्ट सिटी मुख्य कार्यकारी अधिकारी सुमंत मोरे, उपआयुक्त (अतिक्रमण) डॉ. मयुर पाटील, तसेच वैद्यकीय आरोग्य अधिकारी डॉ. तानाजी चव्हाण आणि इतर महत्त्वाचे अधिकारी उपस्थित होते.
आगामी सिंहस्थ महापर्वाच्या तयारीत महापालिका प्रशासन सज्ज असून, अतिक्रमण निर्मूलन, स्वच्छता आणि आरोग्य सेवा या क्षेत्रांमध्ये महत्त्वपूर्ण नियोजन केले जात आहे. महापर्वाच्या यशस्वीतेसाठी महापालिकेच्या या प्रयत्नांचे नागरिक आणि भाविकांकडून कौतुक होत आहे.
