महाराष्ट्र नवनिर्माण सेनेच्या आगामी निवडणुकीसाठी अधिकृत उमेदवारांची यादी अखेर जाहीर करण्यात आली आहे. या यादीत एकूण ४५ उमेदवारांची नावे असून, महत्त्वाचे म्हणजे या यादीत पक्षाच्या अध्यक्ष राज ठाकरे यांचे पुत्र अमित ठाकरे यांना मुंबईतील माहीम मतदारसंघातून उमेदवारी देण्यात आली आहे. अमित ठाकरे यांच्या राजकीय कारकिर्दीतील ही एक महत्त्वपूर्ण संधी आहे.
दररोज महत्वाच्या घडामोडी आणि MBC Marathi च्या संपर्कात राहण्यासाठी आमचा सोशल मीडिया फॉलो करा.
आगामी निवडणुकांसाठी मनसेने अत्यंत विचारपूर्वक निर्णय घेतला आहे. ४५ उमेदवारांची यादी जाहीर करताना, पक्षाने प्रत्येक मतदारसंघाची बारकाईने पाहणी करून निवड केली आहे. यादीत मुंबई, पुणे, ठाणे यांसारख्या महत्त्वाच्या शहरांतील उमेदवारांचा समावेश आहे. विशेष म्हणजे, नाशिकच्या उमेदवारांची यादी मात्र अद्याप जाहीर करण्यात आलेली नाही, ज्यामुळे स्थानिक पातळीवर तर्क-वितर्कांना उधाण आले आहे.
या यादीतील आणखी एक लक्षवेधी गोष्ट म्हणजे, शिवसेना नेते आदित्य ठाकरे यांच्या विरोधात मनसेकडून संदीप देशपांडे यांना उमेदवारी देण्यात आली आहे. ही लढत राजकीय वर्तुळात चांगलीच रंगणार आहे, कारण संदीप देशपांडे हे मनसेचे आक्रमक नेते म्हणून ओळखले जातात, आणि आदित्य ठाकरे यांच्याशी त्यांची लढत राजकीयदृष्ट्या अत्यंत महत्त्वाची मानली जात आहे.
मनसेची ही यादी पक्षाच्या आगामी निवडणुकांतील तयारीचे संकेत देत असून, अमित ठाकरे यांच्यासाठी हे मैदान कसोटीचे असणार आहे. पक्षाच्या प्रमुखांच्या कनिष्ठ पिढीतील नेतृत्त्वाला ही मोठी संधी असून, त्यांच्या प्रचार मोहिमेवर सर्वांचे लक्ष असेल.
राज ठाकरे यांनी यावेळी पक्षाच्या रणनीतीत मोठे बदल केले आहेत. स्थानिक पातळीवरील समस्यांना वाचा फोडण्याचा, तरुण नेत्यांना संधी देण्याचा आणि ठोस विकासाच्या मुद्द्यांवर काम करण्याचा त्यांचा प्रयत्न असल्याचे दिसत आहे.
