नाशिक | Nashik Fraud Case
अण्णासाहेब पाटील आर्थिक विकास महामंडळाच्या ऑनलाइन कर्ज योजनांमध्ये काही फसवे एजंट, ई-सेवा केंद्रे आणि सीएससी सेंटर लाभार्थ्यांना कर्ज मिळवून देण्याचे आमिष दाखवत आर्थिक फसवणूक करत असल्याचे उघड झाले आहे. या प्रकरणी ८ ते १० तक्रारी महामंडळाकडे आल्या असून, महामंडळाचे अध्यक्ष नरेंद्र पाटील यांनी याबाबत नाशिक पोलिसांकडे तक्रार दाखल केली आहे.
फसवणुकीची पद्धत
महामंडळाच्या कर्ज योजनांमध्ये प्रत्यक्ष लाभार्थीऐवजी बनावट अर्जदार, चुकीचे दाखले व खोटे आधार लिंक वापरून लाभ घेतल्याचे समोर आले आहे. काही प्रकरणांत १ लाख रुपयांहून अधिक व्याज परतावा बनावट लाभार्थ्यांनी मिळवला आहे.
नाशिक पोलिसांकडून चौकशी सुरू
या गैरप्रकारांना आळा घालण्यासाठी पोलिसांना माहिती देण्यात आली असून लवकरच चौकशी सुरू होणार आहे. फसवणुकीत जर महामंडळाचे अधिकारी किंवा कर्मचारी सामील असतील तर त्यांच्यावरही कारवाई केली जाईल, असा इशारा पाटील यांनी दिला.
महामंडळाची पारदर्शकता व नवे नियम
- लवकरच तालुका स्तरावर लाभार्थ्यांची यादी जाहीर होणार
- लाभ केवळ आधार लिंक असलेल्या बँक खात्यांनाच
- प्रमाणपत्र नोंदणी पूर्णपणे विनाशुल्क, कोणतेही कंत्राट दिलेले नाही
- लाभार्थ्यांनी थेट नाशिक जिल्हा कार्यालयाशी संपर्क साधावा
व्याजदर कमी करण्याचे आवाहन (Nashik Fraud Case)
महामंडळाने बँकांना कर्ज व्याजदर १२% च्या आत ठेवण्याचे आवाहन केले. गोदावरी व सरस्वती सहकारी बँकांनी याला प्रतिसाद देत व्याजदर १४.५% वरून १२% पेक्षा कमी केले आहेत.
