केंद्रीय रेल्वेमंत्री अश्विन वैष्णव यांनी नाशिकमध्ये आयोजित कार्यक्रमात रेल्वे क्षेत्रात झालेल्या परिवर्तनावर प्रकाश टाकला. त्यांनी पंतप्रधान नरेंद्र मोदी यांच्या नेतृत्वाखालील सरकारने रेल्वे क्षेत्रात केलेल्या मोठ्या सुधारणा आणि नवनवीन तंत्रज्ञानाच्या वापरावर भर दिला. रेल्वे खाजगीकरणाच्या अफवांवरही त्यांनी स्पष्ट भूमिका मांडली.
दररोज महत्वाच्या घडामोडी आणि MBC Marathi च्या संपर्कात राहण्यासाठी आमचा सोशल मीडिया फॉलो करा.
केंद्रीय रेल्वेमंत्री अश्विन वैष्णव यांनी नाशिकमध्ये आयोजित एका विशेष कार्यक्रमात रेल्वे क्षेत्रातील बदल, सुधारणा आणि भविष्यातील योजना यावर भाष्य केले. त्यांनी वीर सावरकरांच्या पुण्यभूमीत हा कार्यक्रम होत असल्याचा आनंद व्यक्त केला आणि सांगितले की, “कामाच्या व्यस्ततेनंतरही मी या कार्यक्रमात सहभागी झालो याचा मला अभिमान आहे.”
त्यांनी नमूद केले की, “गेल्या ४० वर्षांत रेल्वे व्यवस्थेमध्ये अपेक्षित बदल झाले नाहीत, परंतु २०१४ नंतर रेल्वेची मजबुती आणि कामकाजात मोठे परिवर्तन झाले आहे.” मोदी सरकारने रेल्वेला २.५ लाख कोटी रुपये निधी उपलब्ध करून दिल्याचेही त्यांनी सांगितले. यासोबतच “गेल्या १० वर्षांत ४० हजार किलोमीटर रेल्वेचा विस्तार” झाल्याचेही त्यांनी अधोरेखित केले.
रेल्वे खाजगीकरणाबद्दलच्या अफवांवर भाष्य करताना वैष्णव यांनी ठामपणे सांगितले, “रेल्वेचे खाजगीकरण होणार नाही.” त्यांनी संसदेतही हे स्पष्ट केले असल्याचे सांगून जनतेचे आणि उपस्थितांचे गैरसमज दूर केले.
वैष्णव यांनी रेल्वेतील नवनवीन तंत्रज्ञानाच्या वापरावर पंतप्रधान नरेंद्र मोदींचा सततचा आग्रह असल्याचे सांगितले. जम्मू-कश्मीर रेल्वेची सुरक्षितता वाढवण्यासाठी नवीन तंत्रज्ञानाचा वापर करण्यात आला आहे. तसेच, “रेल्वे आणि संरक्षण क्षेत्राला राजकारणात आणू नये,” असे मत व्यक्त करत त्यांनी विरोधकांनाही आवाहन केले.
रेल्वेच्या जनरल बोगींसाठी १२,५०० कोटी रुपयांचे काम सुरू असल्याचे त्यांनी सांगितले. याशिवाय, आरपीएफच्या सुविधा सुधारण्यासाठी ३५ कोटी रुपयांचा निधी मंजूर करण्यात आल्याची माहिती दिली. “आरपीएफ डॉग ट्रेनिंग सेंटर सुधारण्यासाठी विशेष प्रयत्न केले जातील,” असेही त्यांनी नमूद केले.
भविष्यातील योजनांबद्दल बोलताना, वैष्णव यांनी सांगितले की, पंतप्रधान मोदी यांच्या नेतृत्वाखाली रेल्वेत मोठे परिवर्तन झाले आहे आणि बुलेटप्रूफ जॅकेटसह इतर सुविधांच्या मागण्या लवकरच पूर्ण केल्या जातील.
