Latest News: राज्य शासनामार्फत सुरू असलेल्या विविध विकासकामे आणि प्रकल्पांच्या माध्यमातून नागरिकांचे जीवनमान उंचावण्याचा उद्देश असल्याचे प्रतिपादन राज्यपाल सी. पी. राधाकृष्णन यांनी राजकीय पक्षांच्या प्रतिनिधींशी संवाद साधताना केले. राज भवन येथे झालेल्या या बैठकीत माजी राज्यपाल राम नाईक, खासदार अनिल देसाई, आमदार अनिल परब, आमदार पराग शहा, सुभाष देसाई, विद्या चव्हाण, माजी खासदार गोपाळ शेट्टी, प्रकाश रेड्डी यांसह विविध राजकीय पक्षांचे पदाधिकारी उपस्थित होते.
दररोज महत्वाच्या घडामोडी आणि MBC Marathi च्या संपर्कात राहण्यासाठी आमचा सोशल मीडिया फॉलो करा.
राज्यपाल म्हणाले की, शासनाने विविध योजनांद्वारे नागरिकांचे जीवनमान उंचावण्यासाठी महत्त्वाची कामे हाती घेतली आहेत. या कामांमुळे समाजातील प्रत्येक घटकाचे जीवनमान सुधारेल, असा विश्वास त्यांनी व्यक्त केला. या कामांमध्ये राजकीय पक्षांनी सहकार्य करणे आवश्यक असून, नागरिकांना लाभ मिळवून देण्यासाठी विविध सुचवणी लेखी स्वरूपात स्वीकारल्या जातील, असे त्यांनी सांगितले.
राज्यपाल राधाकृष्णन यांनी उद्योग, आदिवासी, अल्पसंख्यांक, तृतीयपंथी, दिव्यांग, खेळाडू, आणि मागासवर्गीय प्रतिनिधींशी देखील संवाद साधला. त्यांनी विविध क्षेत्रातील मान्यवरांनी दिलेल्या सूचनांचा सकारात्मक विचार केला जाईल, असे सांगितले आणि प्राधान्याने संबंधित यंत्रणांनी समस्यांचे निराकरण करण्याचे निर्देश दिले. विशेषत: तृतीयपंथीयांच्या प्रश्नांची तातडीने सोडवणूक करण्यासाठी आदेश दिले जाईल, असे त्यांनी स्पष्ट केले.
राज्यपालांनी मुंबई उपनगर जिल्ह्यातील विकास कामांचा आढावा घेतला आणि या कामांमधून नागरिकांना उत्तम दर्जाच्या सेवा-सुविधा मिळाव्यात यासाठी संबंधित यंत्रणांना निर्देश दिले. बैठकीत मेट्रो, रेल्वे, रस्ते, म्हाडा, वन, आरोग्य, आणि कायदा व सुव्यवस्था यासंबंधित प्रकल्पांचा सखोल आढावा घेण्यात आला.
मुंबई महापालिका आयुक्त भूषण गगराणी, एमएमआरसीएलच्या व्यवस्थापकीय संचालक अश्विनी भिडे, एमएमआरडीएचे अतिरिक्त महानगर आयुक्त विक्रम कुमार, कोकण विभागीय आयुक्त राजेश देशमुख, जिल्हाधिकारी राजेंद्र क्षीरसागर, मेरीटाईम बोर्डाचे मुख्य कार्यकारी अधिकारी माणिक गुरसळ यांसह इतर वरिष्ठ अधिकारी उपस्थित होते.
राज्यपालांनी विकास कामांचे वेळेत आणि गुणवत्तापूर्ण पूर्ततेवर जोर दिला. त्यांनी सुचवले की, प्रकल्पांसाठी आधुनिक तंत्रज्ञानाचा वापर वाढवावा आणि वाहतूक व्यवस्थेचे सुयोग्य नियोजन व्हावे. कायदा व सुव्यवस्था कायम ठेवण्यासाठी पोलीस विभागाने आवश्यक ती खबरदारी घ्यावी, असे निर्देश त्यांनी दिले.
