NCCF च्या कांदा खरेदी धोरणाविरोधात प्रहार संघटनेचे रेल्वे रोको आंदोलन; चांगला कांदा kanda खरेदी करण्याची शेतकऱ्यांची मागणी
सलगाव | नाशिक : आशिया खंडातील सर्वात मोठी कांद्याची बाजारपेठ म्हणून ओळखल्या जाणाऱ्या लासलगावमध्ये कांदा उत्पादक शेतकऱ्यांचा संताप उफाळून आला. NCCF च्या कांदा kanda खरेदी धोरणाविरोधात आणि कांदा उत्पादकांच्या मागण्यांकडे होत असलेल्या दुर्लक्षाच्या निषेधार्थ शेतकऱ्यांनी ‘कांदा एक्स्प्रेस’ रोखत रेल्वे रोको आंदोलन केले. प्रहार संघटनेचे नेते गणेश निंबाळकर यांच्या नेतृत्वाखाली हे आंदोलन करण्यात आले.
लासलगाव रेल्वे स्थानकात कांदा घेऊन जाणारी रेल्वे आंदोलकांनी अडवली. यावेळी मोठ्या संख्येने कार्यकर्ते आणि कांदा उत्पादक शेतकरी आंदोलनात सहभागी झाले होते. मध्य प्रदेशातून आणलेला निकृष्ट आणि सडलेला कांदा दिल्लीला पाठवला जात असल्याचा गंभीर आरोप आंदोलक शेतकऱ्यांनी केला.
‘शेतकऱ्यांच्या घरात चांगला कांदा (kanda), मग सडलेला कांदा का?’
शेतकऱ्यांच्या घरात अद्याप चांगल्या दर्जाचा कांदा उपलब्ध असताना सडलेला आणि निकृष्ट कांदा खरेदी करून तो दिल्लीला का पाठवला जात आहे, असा सवाल आंदोलकांनी NCCFच्या अधिकाऱ्यांना केला.
कांदा खरेदी केंद्रांची माहिती, कोणत्या शेतकऱ्यांकडून कांदा खरेदी करण्यात आला आणि खरेदी प्रक्रियेचे निकष काय आहेत, याबाबत पारदर्शकता नसल्याचा आरोपही आंदोलकांनी केला.
गणेश निंबाळकर यांचा प्रशासनावर हल्लाबोल
आंदोलनादरम्यान प्रहार संघटनेचे नेते गणेश निंबाळकर यांनी प्रशासनाच्या कारभारावर जोरदार टीका केली.
“गेली पाच वर्षे प्रशासनाचा कारभार अपारदर्शक आहे. NCCFने कांदा खरेदी केंद्रे कुठे सुरू केली? हा कांदा कोणत्या शेतकऱ्यांकडून खरेदी केला? याची कोणतीही माहिती दिली जात नाही. शेतकऱ्यांच्या घरात फेब्रुवारी-मार्चमधील कांदा अजून सुरक्षित आहे. मग अवघ्या १५ दिवसांत खरेदी केलेला कांदा कसा सडला?” असा सवाल निंबाळकर यांनी उपस्थित केला.
दिल्लीला चांगल्या दर्जाचा कांदा पाठवला गेला पाहिजे, हीच शेतकऱ्यांची भूमिका असल्याचे त्यांनी स्पष्ट केले.
कांदा खरेदी प्रक्रियेत पारदर्शकतेची मागणी
कांदा खरेदी केंद्रे आणि खरेदी प्रक्रियेबाबत शेतकऱ्यांना स्पष्ट माहिती देण्यात यावी, अशी मागणी आंदोलनकर्त्यांनी केली आहे. स्थानिक शेतकऱ्यांच्या घरात असलेला चांगल्या दर्जाचा कांदा योग्य आणि रास्त भावाने खरेदी करावा, अशीही मागणी करण्यात आली.
शेतकऱ्यांच्या प्रमुख मागण्या
- सडलेला व निकृष्ट दर्जाचा कांदा दिल्लीला पाठवणे तत्काळ थांबवावे.
- स्थानिक शेतकऱ्यांच्या घरातील चांगल्या दर्जाचा कांदा रास्त भावाने खरेदी करावा.
- NCCFची कांदा खरेदी केंद्रे कुठे सुरू आहेत, याची माहिती जाहीर करावी.
- कांदा कोणत्या शेतकऱ्यांकडून खरेदी केला जातो, याची प्रक्रिया पारदर्शक करावी.
- कांदा खरेदी आणि वाहतुकीच्या संपूर्ण प्रक्रियेची माहिती शेतकऱ्यांना उपलब्ध करून द्यावी.
लासलगावसारख्या प्रमुख कांदा बाजारपेठेतच शेतकऱ्यांना आपल्या मागण्यांसाठी रेल्वे रोको आंदोलन करावे लागत असल्याने कांदा खरेदी धोरणाचा प्रश्न पुन्हा चर्चेत आला आहे. प्रशासनाने शेतकऱ्यांच्या मागण्यांकडे गांभीर्याने लक्ष देऊन कांदा खरेदी प्रक्रियेत पारदर्शकता आणावी, अशी मागणी आंदोलनकर्त्यांनी केली आहे.
